Parth Pawar Land Deal : सुप्रिया सुळेंनी पार्थ पवारांना पाठिशी घातलं! ‘त्या’ भूमिकेने पवारांच्या राष्ट्रवादीत नाराजी!

पार्थ पवार यांच्या कथित जमीन गैरव्यवहाराच्या आरोपांवर खासदार सुप्रिया सुळे यांनी घेतलेल्या सौम्य भूमिकेमुळे राष्ट्रवादी काँग्रेस शरदचंद्र पवार पक्षातील पदाधिकारी आणि कार्यकर्त्यांमध्ये नाराजीचा सूर उमटला आहे. सूत्रांकडून मिळालेल्या माहितीनुसार, सुप्रिया सुळे पार्थ पवारांना पाठीशी घालण्याचा प्रयत्न करत असल्याचा कार्यकर्त्यांचा आरोप आहे. या प्रकरणामुळे पक्षात अंतर्गत अस्वस्थता वाढल्याचे वृत्त आहे.

सध्या दोन्ही राष्ट्रवादी काँग्रेस पक्ष, म्हणजेच अजित पवार गट आणि शरदचंद्र पवार गट, असे वेगवेगळे झाले असले तरी, सुप्रिया सुळे (ज्या पार्थ पवारांच्या आत्या आहेत) यांनी या संवेदनशील प्रकरणी घेतलेली सौम्य भूमिका पक्ष कार्यकर्त्यांना तीव्रतेने खटकली आहे. खालच्या स्तरावरील कार्यकर्ते पक्षीय संघर्षात आणि राजकीय आरोपांच्या झडपेत अडकून पडलेले असताना, पक्षाचे काही वरिष्ठ नेते मात्र अशा गंभीर प्रकरणांवरही सौम्य भूमिका घेतात, अशी भावना राष्ट्रवादी काँग्रेस शरदचंद्र पवार पक्षातील सामान्य नेते आणि कार्यकर्त्यांमध्ये मोठ्या प्रमाणात दिसून येत आहे.