अख्खाच्या अख्खा रस्ताच वाहिला, मोठं भगदड अन्… त्र्यंबकेश्वर परिसरातील धक्कादायक Video

नाशिक जिल्ह्यात मुसळधार पावसाचा इशारा देण्यात आल्यानंतर प्रशासन सतर्क झाले आहे. हवामान विभागाने पुढील काही तासांत जोरदार पावसासह काही ठिकाणी ढगफुटीसदृश परिस्थिती निर्माण होण्याची शक्यता व्यक्त केली आहे. याच पार्श्वभूमीवर त्र्यंबकेश्वर परिसरात मोठी घटना घडली असून त्र्यंबकेश्वरकडून वाड्याकडे जाणारा पर्यायी रस्ता पावसाच्या पाण्यात वाहून गेला आहे.

त्र्यंबकेश्वर परिसरात पुलाचे काम सुरू असल्यामुळे प्रशासनाने काही दिवसांपूर्वी पर्यायी रस्ता सुरू केला होता. मात्र, सोमवारी रात्रीपासून सुरू असलेल्या मुसळधार पावसामुळे या रस्त्यावर मोठ्या प्रमाणात पाणी साचले. पाण्याचा वेग वाढल्याने अखेर रस्त्याचा काही भाग वाहून गेला. त्यामुळे वाडा आणि खोडाळा भागाकडे जाणारी वाहतूक पूर्णपणे बंद करण्यात आली आहे.

या घटनेनंतर प्रशासन आणि सार्वजनिक बांधकाम विभागाचे अधिकारी घटनास्थळी दाखल झाले आहेत. परिसरातील नागरिकांना सतर्क राहण्याचे आवाहन करण्यात आले आहे. तसेच अनावश्यक प्रवास टाळावा आणि नदी-नाल्यांच्या परिसरात जाऊ नये, असे निर्देश प्रशासनाकडून देण्यात आले आहेत.