शिंदे, दादांचा मालक एकच! उद्धव ठाकरेंची शिंदेसेनेवर खोचक टीका

उद्धव ठाकरे यांनी महायुतीतील एकनाथ शिंदे गट आणि अजित पवार गटावर जोरदार टीका केली आहे. या दोन्ही पक्षांना भाजपची बी टीम संबोधत, त्यांचा मालक एकच असल्याचे ठाकरे म्हणाले. भाजपने त्यांना ॲनाकोंडा प्रमाणे गिळल्याचा आरोपही त्यांनी केला.

नागपूरमध्ये होणाऱ्या हिवाळी अधिवेशनात विरोधी पक्षनेतेपद त्वरित नियुक्त करण्याची मागणी उद्धव ठाकरे यांनी केली आहे. जर विरोधी पक्षनेतेपद दिले नाही, तर उपमुख्यमंत्रिपद रद्द करावे, कारण ते संविधानात नमूद नाही, असेही त्यांनी म्हटले. लोकशाही जिवंत ठेवण्यासाठी विरोधी पक्षनेतेपद आवश्यक असल्याचे त्यांचे म्हणणे आहे.

याव्यतिरिक्त, मतदार याद्यांमधील गोंधळावर बोट ठेवत उद्धव ठाकरे यांनी महापालिका निवडणुका पुढे ढकलण्याची मागणी केली. सत्ताधारी पक्ष बूथ कॅप्चरिंगऐवजी संपूर्ण निवडणूक कॅप्चर करत असल्याचा आरोपही त्यांनी केला आहे.