Dasara Melava : शिवाजी पार्कवर दसरा मेळाव्याची जय्यत तयारी सुरु; उद्धव ठाकरे नेमका कोणता नवा संदेश देणार?

दादर येथील छत्रपती शिवाजी महाराज पार्कवर शिवसेना (उद्धव बाळासाहेब ठाकरे) पक्षाच्या दसरा मेळाव्यासाठी सध्या जय्यत तयारी सुरू आहे. संपूर्ण शिवसैनिकांचे लक्ष आता २० ऑक्टोबर रोजी होणाऱ्या या मेळाव्याकडे लागले आहे. विशेषतः उद्धव ठाकरे त्यांच्या भाषणात काय बोलणार आणि पक्षाच्या भविष्याबाबत कोणते मार्गदर्शन करणार, याबद्दल उत्सुकता आहे.

२० ऑक्टोबर रोजी सायंकाळी ६ वाजता दसरा मेळाव्याला सुरुवात होईल. ठाकरे संपूर्ण शिवसैनिकांना ज्या ठिकाणाहून संबोधित करतील, तिथे एक भव्य व्यासपीठ उभारण्याचे काम पक्षाच्या वतीने वेगाने सुरू आहे. इतर आवश्यक तयारीही पूर्णत्वास येत आहे. मुंबईमध्ये त्याच दिवशी दोन दसरा मेळावे होणार आहेत. एकीकडे शिवाजी पार्कवर उद्धव ठाकरे यांच्या नेतृत्वाखालील दसरा मेळावा होणार आहे, तर दुसरीकडे गोरेगाव नेस्कोमध्ये एकनाथ शिंदे यांच्या शिवसेनेचा मेळावा पार पडेल. टीव्ही ९ मराठीच्या निवृत्ती बाबर यांनी कॅमेरामन कमलेश डोंगरे यांच्यासह शिवाजी पार्कवरील तयारीचा आढावा घेतला. उद्धव ठाकरे यांचे भाषण राज्याच्या राजकारणात कोणत्या नव्या दिशा देईल, याकडे संपूर्ण महाराष्ट्राचे लक्ष लागलेले आहे.