Viral Video : राहुल नार्वेकर अन् हरिभाऊ राठोड यांच्यात बाचाबाची, निवडणूक कार्यालयात घडलं काय? व्हिडीओ व्हायरल

विधानसभा अध्यक्ष राहुल नार्वेकर आणि ओबीसी नेते हरिभाऊ राठोड यांच्यातील निवडणूक कार्यालयात झालेल्या वादाचा एक व्हिडीओ सध्या सोशल मीडियावर मोठ्या प्रमाणात व्हायरल होत आहे. उमेदवारी अर्ज भरण्याच्या शेवटच्या दिवशी हा वाद झाला असल्याचे सांगण्यात येत आहे. जे जे रुग्णालयाच्या मागे असलेल्या क्रूडासह कंपनी येथील निवडणूक कार्यालयात वॉर्ड क्रमांक २२४, २२५, २२६ आणि २२७ च्या उमेदवारांनी अर्ज भरण्यासाठी हजेरी लावली होती. याचवेळी आम आदमी पार्टीच्या काही उमेदवारांना उमेदवारी अर्ज भरू दिले जात नसल्याचा आरोप आम आदमी पार्टी आणि मनसेकडून करण्यात आला.

या घटनेदरम्यान, हरिभाऊ राठोड आम आदमी पार्टीच्या उमेदवारांसोबत उपस्थित होते. या संपूर्ण प्रकरणावर शिवसेना (उद्धव बाळासाहेब ठाकरे) नेते संजय राऊत यांनी राहुल नार्वेकर यांच्यावर निवडणूक अधिकाऱ्यांवर दबाव आणल्याचा आरोप केला आहे. तसेच, संध्याकाळी चारनंतरचे सीसीटीव्ही फुटेज गायब असल्याचा दावाही त्यांनी केला आहे. या व्हायरल व्हिडीओमुळे महाराष्ट्राच्या राजकीय वर्तुळात चर्चांना उधाण आले आहे.