Nano पेक्षा छोटी कार, Hero आणतेय दोन आसनी छोटी इलेक्ट्रिक कार, कधी होणार लॉन्च?

भारतीय ऑटोमोबाईल बाजारात आता छोट्या इलेक्ट्रिक कारची चर्चा रंगू लागली आहे. दुचाकी वाहनांसाठी प्रसिद्ध असलेली Hero MotoCorp कंपनी आता चारचाकी इलेक्ट्रिक वाहन क्षेत्रात पाऊल टाकण्याच्या तयारीत असल्याचे संकेत मिळत आहेत. कंपनीच्या Vida या इलेक्ट्रिक वाहन ब्रँडची NEX 3 ही छोटी मायक्रो इलेक्ट्रिक कार सध्या चर्चेत आली आहे.

Hero च्या Vida ब्रँडने यापूर्वी मायक्रो मोबिलिटीसाठी तीन संकल्पना सादर केल्या होत्या. त्यापैकी NEX 3 ही दोन आसनी इलेक्ट्रिक कार विशेष लक्षवेधी ठरली होती. आता या कारच्या डिझाइनचे पेटंट समोर आले असून, कंपनी या प्रकल्पावर काम करत असल्याचे संकेत मिळत आहेत. मात्र, पेटंट दाखल झाले म्हणजे कार लवकरच बाजारात दाखल होणार असा त्याचा अर्थ होत नाही.

दोन जणांसाठी खास रचना

Vida NEX 3 ही चार चाकांची छोटी इलेक्ट्रिक मायक्रो कार असेल. यामध्ये चालकासाठी पुढे आणि प्रवाशासाठी मागे अशा पद्धतीने दोन आसनांची व्यवस्था करण्यात आली आहे. आकाराने ही कार सध्याच्या सामान्य कारच्या तुलनेत खूपच छोटी असल्याचे सांगितले जात आहे. त्यामुळे शहरातील गर्दीच्या रस्त्यांवरून प्रवास करणे आणि पार्किंग करणे अधिक सोपे होऊ शकते.

या कारचे सर्वात मोठे वैशिष्ट्य म्हणजे वरच्या दिशेने उघडणारा सिंगल गलविंग डोअर. याच एका दरवाजातून चालक आणि मागील सीटवरील प्रवाशाला कारमध्ये प्रवेश करता येईल तसेच बाहेर पडता येईल. कारला मोठ्या काचेच्या खिडक्या, आकर्षक बंपर, LED लाइटिंग आणि मागील बाजूस षटकोनी आकाराची विंडशील्ड देण्यात आली आहे.

मिळू शकतात आधुनिक फीचर्स

छोटी कार असली तरी यामध्ये आधुनिक सुविधांची अपेक्षा आहे. एअर कंडिशनिंग, स्मार्टफोन कनेक्टिव्हिटी आणि ऑनलाइन सर्व्हिसेस यांसारखी फीचर्स मिळण्याची शक्यता आहे. विशेषतः शहरातील कमी अंतराच्या दैनंदिन प्रवासासाठी ही कार उपयुक्त ठरू शकते.

NEX 3 चे छोटे आकारमान आणि दोन आसनी रचना पाहता, अनेकांना भारतातील लोकप्रिय Tata Nano ची आठवण होऊ शकते.

कधी होणार लॉन्च?

सध्या Hero MotoCorp कडून NEX 3 च्या लॉन्चची तारीख, किंमत, बॅटरी क्षमता, ड्रायव्हिंग रेंज किंवा अधिकृत तांत्रिक माहिती जाहीर करण्यात आलेली नाही. त्यामुळे ही कार प्रत्यक्षात बाजारात कधी येणार, हे पाहणे महत्त्वाचे ठरणार आहे.