केंद्र सरकार आता स्वस्तात गव्हाचे पीठ विकणार, पाहा कुठे मिळणार ‘भारत आटा’

मुंबई | 1 नोव्हेंबर 2023 : यंदा गव्हाचे भाव चांगलेच वाढले आहे. गव्हाच्या पिकांची कापणी झाली तेव्हा खुल्या भावात सुटे ब्रॅंड नसलेले गव्हाचे पीठ 30 रुपये किलो विकले जात होते. आता गव्हाच्या पीठाचा भाव 35 रुपये किलो इतका वाढला आहे. तर ब्रॅंडेड गव्हाचे पीठ 40-50 रुपये किलो विकले जात आहे. एमपी गव्हाच्या पीठाचे भाव तर खूपच जादा आहेत. केंद्र सरकारने गव्हाच्या पीठाचा वाढता दर पाहून स्वस्तात गव्हाचे पीठ विकण्याचा निर्णय घेतला आहे. स्वस्त गव्हाच्या पीठाची विक्री या महिन्याच्या सात तारखेपासून होणार आहे.

केंद्रीय ग्राहक विभागाच्या एका वरिष्ठ अधिकाऱ्यांनी सांगितले की सरकारी गव्हाच्या पीठाची विक्री ‘भारत ब्रॅंड’ अंतर्गत होणार आहे. त्याचा दर 27.50 रुपये प्रति किलोग्रॅम असणार आहे. या संदर्भात आणखी विचारविनिमय होणार आहे. त्यासाठी राष्ट्रीय ग्राहक सहकारी संघाला ( NCCF ) नोडल एजन्सी म्हणून नियुक्त केले जाऊ शकते. भारत ब्रॅंड आट्यासाठी भारतीय अन्न महामंडळ ( FCI ) अडीच लाख टन गव्हाचा पुरवठा करणार आहे. या गव्हाचे पीठ करून 10 आणि 30 किलोची पॅकींग करून विक्री केली जाणार आहे.

डाळीचे भाव वाढल्यानंतर केंद्र सरकारने 17 जुलै 2023 पासून भारत ब्रॅंडने चणा डाळ विकायला सुरुवात केली होती. भारत डाळीची एक किलोग्रॅमची किरकोळ विक्रीची पाकिटे तयार केली होती. ही चण्याची डाळ 60 रुपये किलो दराने विकली जात आहे. जर कोणी 30 किलो डाळ विकत घेणार असेल तर त्यांना 55 रुपये किलो दराने डाळ मिळते.

अशी होणार स्वस्त गव्हाच्या पीठाची विक्री

भारत आटाचे वितरण भारतीय राष्ट्रीय कृषी सहकारी विपणन संघ लि. (नाफेड ), राष्ट्रीय ग्राहक सहकारी संघ ( एनसीसीएफ ), केंद्रीय भांडार आणि सफल यांच्या किरकोळ विक्री केंद्रातून केली जाऊ शकते. या योजनेतून स्वस्त गव्हाचे पीठ राज्य सरकारना त्यांच्या कल्याणकारी योजना, पोलिस, कारागृहांतर्गत पुरवठ्यासाठी पुरविले जाणार आहे. सहकारी संस्थामार्फत तसेच महामंडळामार्फत देखील या स्वस्त गव्हाच्या पीठाची विक्री केली जाऊ शकते.