मित्राला घरी बोलावून पार्टी करायचा, मग पुढे जे घडलं त्याचा त्याने स्वप्नातही विचार केला नसेल !

कन्नौज : उत्तर प्रदेशात मैत्रीच्या नात्याला काळिमा फासणारी एक धक्कादायक घटना उघडकीस आली आहे. अनैतिक संबंधातून मित्रानेच मित्राची हत्या केल्याची धक्कदायक घटना कन्नौज जिल्ह्यात घडली आहे. राजू शर्मा असे मयताचे नाव आहे. याप्रकरणी मयताची पत्नी आणि मित्र दोघांनाही पोलिसांनी ताब्यात घेतले आहे. दोघांचीही कसून चौकशी सुरु आहे. पोलिसांनी राजूचा मृतदेह ताब्यात घेत शवविच्छेदनासाठी रुग्णालयात पाठवला. कन्नौजच्या छिब्रामाऊ कोतवाली भागातील सिकंदरपूर येथे ही घटना घडली.

राजू शर्मा हा पत्नी आणि 3 मुलांसह सिकंदरपूर येथे राहत होता. मजुरी करुन शर्मा कुटुंबाचा उदरनिर्वाह चालवत होता. कामाच्या ठिकाणी राजूची सगीर नावाच्या तरुणाशी मैत्री झाली. यानंतर सगीर नेहमी राजूच्या घरी येऊ लागला. सगीर अनेकदा राजूच्या घरी दारुची पार्टी करण्यासाठी यायचा. यादरम्यान राजूची पत्नी आणि सगीर यांच्यात प्रेमसंबंध झाले.

पत्नीला मारहाण केली म्हणून मित्राच्या हत्येचा कट

दरम्यान, महिनाभरापूर्वी राजूचा पत्नीसोबत काही कारणावरून वाद झाला होता. यावरुन राजूने पत्नीला मारहाण केली. सगीरला हा प्रकार कळताच तो संतापला. यानंतर त्याने राजूला मार्गावरून हटवण्याचा कट रचला. त्यानुसार, गुरुवारी 8 जून रोजी सगीरने राजूची पत्नी आणि तिच्या मुलांना जत्रा दाखवण्याच्या बहाण्याने नेले. यानंतर त्यांना तेथेच सोडून तो राजूच्या घरी परतला. प्रथम सगीरने राजूला मारहाण केली. यानंतर त्याची हत्या केली.

सकाळी नातेवाईकांनी राजूचा मृतदेह पाहिल्यानंतर पोलिसांना माहिती दिली. माहिती मिळताच पोलिसांनी घटनास्थळी दाखल होत मृतदेह शवविच्छेदनासाठी रुग्णालयात पाठवला. चौकशीनंतर पोलिसांनी राजूची पत्नी आणि तिच्या प्रियकराला ताब्यात घेतले.