उत्तर प्रदेश : उत्तर प्रदेशातील (Uttar Pradesh) मथुरामध्ये गुरुवारी एक धक्कादायक घटना उघडकीस आली आहे. घाणेरडे पाय घेऊन बेडवर चढला म्हणून सावत्र बापाने 11 वर्षाच्या मुलाची बेदम मारहाण करत हत्या (Step Father Killed Son) केली. याप्रकरणी मथुरा पोलिसांनी (Mathura Police) आरोपी बापाला अटक केली आहे. प्रेमवीर असे आरोपी बापाचे नाव आहे. मुलाच्या दुर्दैवी मृत्यूमुळे कुटुंबावर शोककळा पसरली आहे. मथुरेतील ठाणे हायवे परिसरातील पुष्प विहार कॉलनीत ही घटना घडली आहे.
मयत बालकाची आई नीलम हिने आरोपी प्रेमवीर सोबत दुसरा विवाह केला होता. चार महिन्यांपूर्वीच हा विवाह झाला होता. नीलमला पहिल्या पतीपासून दोन मुले होती. त्यानंतर तिने प्रेमवीरसोबत प्रेमविवाह केला होता. आरोपी पत्नी नीलम आणि तिच्या दोन मुलांसह पुष्पा विहार कॉलनीत राहत होता.
नीलमचा मोठा मुलगा घाणेरडे पाय घेऊन बेडवर चढल्याने आरोपी प्रेमवीरचा पारा चढला. याच रागातून त्याने मुलाला बेदम मारहाण करण्यास सुरुवात केली. या मारहाणीत 11 वर्षाच्या बालकाचा मृत्यू झाला, असे एसपी सिटी मातम प्रकाश सिंह यांनी सांगितले.
ही सर्व घटना घडली तेव्हा नीलमचा 7 वर्षाचा दुसरा मुलगा तिथेच होता. मथुरा पोलिसांनी लहान मुलाच्या जबाब नोंदवत आरोपी विरोधात गुन्हा दाखल केला. पोलिसांनी आरोपीची चौकशी केली असता आरोपीने हत्येची कबुली दिली. या घटनेमुळे परिसरात खळबळ माजली आहे.