महिलेच्या हत्येने बदलापुरात खळबळ, पतीनेच पत्नीला संपवल्याचा संशय

बदलापूर / निनाद करमरकर : बदलापूरमध्ये सलग दुसऱ्या दिवशी झालेल्या हत्येच्या घटनेने परिसरात एकच खळबळ माजली आहे. महिलेची जीवघेणा हल्ला करत हत्या करण्यात आल्याची घटना उघडकीस आली आहे. बदलापूर पूर्वेतील राऊत आर्केडमध्ये हा प्रकार घडला असून, यानंतर पोलिसांनी घटनास्थळी धाव घेत तपासाला सुरुवात केली आहे. राजश्री गणेश भोसले असे मयत महिलेचे नाव आहे. राजश्रीचा पती फरार आहे. यामुळे पतीनेच पत्नीची हत्या केल्याचा संशय असून, पोलीस पतीचा शोध घेत आहेत. पतीला सापडल्यानंतरच सर्व प्रकरणाचा उलगडा होईल.

दुपारच्या सुमारास महिला घरात मृतावस्थेत आढळली

बदलापूर पूर्वेच्या शिरगाव परिसरातील राऊत चौकात राऊत आर्केड नावाची इमारत आहे. या इमारतीत राजश्री गणेश भोसले ही 35 वर्षीय महिला पती आणि मुलासह वास्तव्याला होती. आज दुपारच्या सुमारास ही महिला घरात मृतावस्थेत आढळून आली. पोलिसांना भोसले यांच्या घरात काही अघटित घडल्याची माहिती मिळताच बदलापूर पूर्व पोलिसांनी घटनास्थळी धाव घेतली. फ्लॅटचा दरवाजा तोडून आत प्रवेश केला असता आत महिलेची हत्या करण्यात आल्याचं समोर आलं.

पोलिसांकडून अधिक तपास सुरु

पोलिसांनी पंचनामा करून महिलेचा मृतदेह ताब्यात घेत बदलापूर ग्रामीण रुग्णालयात शवविच्छेदनासाठी पाठवला. दरम्यान, राजश्रीची हत्या ही तिच्या पतीने गणेश भोसले यानेच केल्याचा संशय पोलिसांनी व्यक्त केला असून, त्या दृष्टीने पोलिसांचा सध्या तपास सुरू आहे. गणेशचा फोनही बंद येत आहे. ही हत्या का करण्यात आली? याचं कारण मात्र अद्यापही स्पष्ट होऊ शकलेलं नाही. बदलापूर पूर्व पोलीस या प्रकरणाचा पुढील तपास करत आहेत.