बदलापूर पुन्हा हादरलं, कॅन्सरच्या उपचारांसाठी आलेल्या तरुणीवर अत्याचार, फक्त एका क्लूमुळे…

फोटो सौजन्य - फाईल फोटो

बिहारमध्ये राहणाऱ्या एका 13 वर्षीय मुलीला कॅन्सरचं निदान झालं. तिला मुंबईत उपचारांसाठी यायचं असल्यानं जवळच्याच गावात राहणाऱ्या एका 27 वर्षीय नराधमानं तिला आधार देत बदलापूरमध्ये भाड्याने घर घेऊन दिलं. पण अखेर त्याच्यातला नराधम जागा झाला. त्याने त्या 13 वर्षांच्या या कॅन्सर पीडित मुलीला आपल्या वासनेची शिकार बनवलं. मात्र उपचारादरम्यान मुलगी गरोदर असल्याचं समोर आलं आणि या नराधमाचं बिंग फुटलं. या घटनेनंतर बदलापूर पूर्व पोलिसांनी त्याला बेड्या ठोकल्या आहेत.

नेमकं प्रकरण काय?

बिहारमधल्या या १३ वर्षीय मुलीला कॅन्सर असल्याचं निदान झाल्यानंतर उपचारासाठी मुंबईला येण्याचा सल्ला त्यांना अनेकांनी दिला. हीच संधी साधत जवळच्या गावात राहणाऱ्या सुरज सिंग या नराधमानं तिच्यासह तिच्या कुटुंबियांना बदलापूरमध्ये एक घर भाड्याने घेऊन दिलं. या घरी त्याचंही कुटुंबाला आधार देण्याच्या बहाण्यानं त्याचे नियमित येणं-जाणं होतं. याच दरम्यान संधी साधत त्याने तीन ते चार वेळा कॅन्सर पीडित मुलीशी शारीरिक संबंध ठेवले. त्यातून ती गरोदर राहिली. उपचारादरम्यान ही बाब उघड झाली.

यानंतर मुंबईच्या कस्तुरबा पोलीस ठाण्यात पोक्सो कायद्यांतर्गत झिरो नंबरचा एफआयआर दाखल केला. यानंतर बदलापूर पूर्व पोलीस ठाण्यात ही तक्रार ट्रान्सफर करण्यात आली. मात्र या गुन्ह्याच्या तपासात आरोपीला वाचवण्यासाठी पीडित मुलगी आणि तिच्या कुटुंबियांनी पोलिसांना दोन वेळा खोट्या कहाण्या रचून सांगितल्या. पण हा बनाव सहाय्यक पोलीस आयुक्त शैलेश काळे, बदलापूर पूर्व पोलीस ठाण्याचे वरिष्ठ पोलीस निरीक्षक किरण बालवडकर आणि पोलीस निरीक्षक राजेश गज्जल यांनी ओळखला.

बदलापुरात पुन्हा एकदा संतापाची लाट

त्यानंतर त्यांनी पीडितेच्या कुटुंबाची कसून चौकशी केली. अखेर त्यात त्यांनी सत्य समोर आले. पोलिसांनी गुन्हा दाखल केल्यानंतर तब्बल दीड महिन्यांनी नराधम आरोपी सुरज सिंग याला बिहारमधून बेड्या ठोकल्याची माहिती पोलीस उपायुक्त सचिन गोरे यांनी दिली आहे. यानंतर आरोपी सुरज सिंग याची सध्या न्यायालयीन कोठडीत रवानगी करण्यात आली आहे. या घटनेमुळे बदलापूर शहरात पुन्हा एकदा संतापाची लाट पसरली आहे.