सुपारी देऊन पत्नीला संपवले, मग लुटमारीचा बनाव केला; पण अखेर ‘असा’ फसला पोलिसांच्या जाळ्यात

बेगुसराय : अनैतिक संबंधाला विरोध करत असल्याने पतीने पत्नीचा काटा काढल्याची घटना बिहारमधील बेगुसरायमध्ये उघडकीस आली आहे. सुपारी देऊन पत्नीची हत्या करत लुटमारीचा बनाव केला. मात्र पोलिसांच्या तावडीतून आरोपी स्वतःला वाचवू शकला नाही. पोलीस चौकशीत आरोपीचा पर्दाफाश झालाच. पोलिसांनी आरोपी पतीसह चार आरोपींना हत्यारांसह अटक केली आहे. प्रशांत कुमार असे आरोपी पतीचे नाव आहे. मोना राणी असे मयत पत्नीचे नाव आहे. आरोपी पती पेशाने डॉक्टर असून, त्याचे त्याच्याच क्लिनिकमध्ये काम करणाऱ्या एका नर्ससोबत अनैतिक संबंध होते.

काय आहे प्रकरण?

बिहार जिल्ह्यातील बेगुसराय येथील डॉ. प्रशांत कुमार याचे त्याच्या क्लिनिकमधील नर्ससोबत अनैतिक संबंध सुरु होते. प्रशांतच्या पत्नीला या संबंधांची माहिती मिळाल्याने त्या दोघांमध्ये यावरुन वाद आणि हाणामारी होत होती. रोजच्या वादाला कंटाळून पतीने पत्नीला आपल्या मार्गातून दूर करण्याचे ठरवले. यासाठी त्याने नियोजनपद्ध पद्धतीने हत्येचा कट रचला.

पतीने दोन शूटर्सना पत्नीच्या हत्येची सुपारी दिली होती. पती बाईकवरुन पत्नी आणि मुलासह गढपुरा येथे चालला होता. याचदरम्यान एका निर्जन ठिकाणी ठरल्याप्रमाणे आरोपी दबा धरुन बसले होते. प्लाननुसार आरोपींनी महिलेवर गोळी झाडून तिची हत्या करत फरार झाले. यानंतर पतीने पोलिसांना हत्येची माहिती देत मोबाईल लुटण्याच्या प्रयत्नात चोरट्यांनी पत्नीची हत्या केल्याचे सांगतिले.

घटनेची माहिती मिळताच पोलिसांनी घटनास्थळी दाखल होत प्रकरणाचा तपास सुरु केला. तपासादरम्यान पतीची चौकशी केली असताना पोलिसांना संशय आला आणि त्यांनी पतीची कसून चौकशी केली. अखेर पतीने सत्य पोलिसांमोर उघड केले. पोलिसांनी आरोपी पतीसह, त्याचा मित्र आणि दोन शार्प शूटर्स अशा चार आरोपींना अटक केली आहे.