घरगुती वाद टोकाला गेला, भाऊच भावाच्या जीवावर उठला; बसस्थानकात नेमके काय घडले?

नाशिक / चैतन्य गायकवाड : घरगुती वादातून भावानेच टरबूज विक्रेत्यावर जीवघेणा हल्ला केल्याची घटना नाशिकमध्ये उघडकीस आली आहे. नाशिकच्या दिंडोरी रोडवरील निमाणी बस स्थानकाजवळ ही घटना घडली. या घटनेत टरबूज विक्रेत्याचा कान तुटला. सोमनाथ भोसले असे 29 वर्षीय टरबूज विक्रेत्याचे नाव आहे. आधी सोमनाथच्या वडिलांवर आरोपींनी हल्ला केला, मग मध्यस्थी करायला आलेल्या सोमनाथवर हल्ला केला. या हल्ल्यात वडिलही जखमी झाले आहेत. जखमी सोमनाथ आणि त्याचे वडील आसाराम भोसले यांना उपचारासाठी जिल्हा शासकीय रुग्णालयात दाखल करण्यात आले आहे. याप्रकरणी पंचवटी पोलीस ठाण्यात गुन्हा दाखल करण्यात आला आहे.

कौटुंबिक वादातून पिता-पुत्रावर हल्ला

सोमनाथ भोसले हा निमाणी बस स्थानकाच्या बाजूला टरबूज विक्रीचा व्यवसाय करतो. सोमनाथ हा गुरुवारी दुपारी आपल्या दुकानावर टरबूज विक्री करत असताना त्याचा भाऊ चेतन भोसले आणि त्याचे इतर चार-पाच नातेवाईक तेथे आले. चेतन भोसले आणि सोमनाथ भोसले यांच्यात कौटुंबिक वाद आहेत. हा वाद मिटवण्यासाठी सर्वजण तेथे आले होते. मात्र वाद मिटण्याऐवजी वाद पुन्हा सुरु झाला.

जखमींवर शासकीय रुग्णालयात उपचार सुरु

सर्व आरोपींनी सोमनाथ भोसले याला शिवीगाळ करण्यास सुरुवात केली. यावेळी आरोपींनी सोमनाथच्या वडिलांवर धारदार शस्त्राने हल्ला केला. यावेळी सोमनाथ मध्यस्थी करायला गेला असता आरोपींनी त्याच्यावरही हल्ला केला. यात त्याचा उजवा कान तुटला. जखमी पिता-पुत्रांना जिल्हा शासकीय रुग्णालयात उपचारासाठी दाखल करण्यात आले आहे. याप्रकरणी पंचवटी पोलीस ठाण्यात गुन्हा नोंद करण्यात आला असून, पोलीस अधिक तपास करत आहेत.