Rahul Gandhi: ज्ञानेश कुमार यांच्याविरोधात नवीन बॉम्बगोळा, राहुल गांधी यांची मोठी हिंट, आज काय खुलासा?

Rahul Gandhi on CEC Gyanesh Kumar: केंद्रीय मुख्य निवडणूक आयुक्त ज्ञानेश कुमार यांच्याविरोधात विरोधी पक्षांच्या इंडिया आघाडीने मोर्चा उघडला आहे. थोड्या ब्रेकनंतर आज ज्ञानेश कुमार यांच्याविरोधात दिल्लीतील रामलीला मैदानावर महारॅली होत आहे. SIR प्रक्रिया आणि कोट्यवधी नागरिकांची नावं मतदार याद्यांबाहेर फेकल्या गेल्याने महाआंदोलन होत आहे. त्याचवेळी राहुल गांधी हे मुख्य निवडणूक आयुक्तांविरोधात मोठा नवीन खुलासा करणार असल्याची माहिती समोर येत आहे. काल प्रति संसदेत त्यांनी याविषयीची हिंट दिली. ज्ञानेश कुमारांविरोधात अत्यंत गंभीर आरोप आणि मोठा खुलासा करण्याच्या ते तयारीत आहेत.

मॉक पार्लमेंटमध्ये राहुल गांधींचा एल्गार

काल काँग्रेस अध्यक्ष मल्लिकार्जुन खरगे यांच्या निवासस्थानी प्रति संसद भरवण्यात आली. त्यात ज्ञानेश कुमार यांच्याविरोधात महाभियोग चालवण्याची शिफारस करण्यात आली. विरोधक ज्ञानेश कुमार यांच्या विरोधात सर्व आयुधं वापरत असल्याचे दिसत आहे. लोकशाही मार्गाने संताप व्यक्त करत आहेत. काल राहुल गांधी यांनी जोरदार आणि आक्रमक भाषण केले. त्यांनी भाजपवर घणाघाती टीका केली. भाजप ज्ञानेश कुमार यांना वाचवण्याचा प्रयत्न करत असल्याचा आरोप करत त्यांनी आजच्या महारॅलीत नवीन राजकीय बॉम्ब टाकण्याचे संकेत दिले. काल मुख्य निवडणूक आयुक्तांविरोधात महाभियोगाचा एक सांकेतिक प्रस्तावही मंजूर करण्यात आला.

भाजपकडूनही राहुल गांधींवर हल्लाबोल

राहुल गांधी यांच्या कालच्या भाषणाने राजकीय वातावरण तापले. भारतीय जनता पक्षानेही काँग्रेससह राहुल गांधी यांच्यावर तिखट प्रतिक्रिया दिली. मॉक पार्लमेंट हे एक नाटक असल्याची टीका भाजप प्रवक्ते संबित पात्रा यांनी केली. आगामी निवडणुकीतील पराभव लक्षात आल्यापासूनच राहुल गांधी आणि काँग्रेस घटनात्मक संस्थांवर निराधार आरोप करत असल्याची टीका संबित पात्रा यांनी केली. मतदार याद्यांमधील सखोल पुनरीक्षण SIR विषयी काँग्रेस समाजात दिशाभूल करत असल्याचा आरोपही पात्रा यांनी केला.

सकाळी 10 वाजता सुरूवात

राहुल गांधी यांच्या नेतृत्वाखाली निघणारी ही महारॅली सकाळी 10 ते संध्याकाळी 5 या वेळेत रामलीला मैदानावर होत आहे. सकाळी इंदिरा भवन येथून मिंटो रोडपर्यंत खुल्या बसमधून इंडिया आघाडीतील प्रमुख नेते येतील. तिथून पायी ते रामलीला मैदानाकडे निघतील. या रॅलीत ममता बॅनर्जी, अखिलेश यादव, तेजस्वी यादव यांच्यासह इंडिया आघाडीतील 20 घटक पक्षांचे प्रमुख नेते सहभागी होतील. तर सीजेपी आणि इतर पक्षांनी सुद्धा या महारॅलीला पाठिंबा दिला आहे.