दुचाकीवरुन घरी चालला होता, पण वाटेतच ते आडवे आले अन् तो घरी पोहचूच शकला नाही !

सांगली / शंकर देवकुळे : पैशाच्या वादातून पाठलाग करत एका व्यक्तीची निर्घृण हत्या केल्याची घटना सांगलीत घडली आहे. सांगलीच्या कुपवाड जवळच्या बामणोली येथे निर्घृण खून करण्यात आला आहे. अमर उर्फ गुट्ट्या जाधव असं हत्या करण्यात आलेल्या इसमाचं नाव असून, तो सराईत गुन्हेगार आहे. रात्री 10 वाजण्याच्या सुमारास भररस्त्यात हा हत्येचा थरार घडला. या घटनेने कुपवाड शहरामध्ये एकच खळबळ उडाली आहे. घटनेची माहिती मिळताच कुपवाड एमआयडीसी पोलिसांनी घटनास्थळी धाव घेत पंचनामा केला. मृतदेह शवविच्छेदनासाठी रुग्णालयात पाठवला. हत्या केल्यानंतर आरोपी फरार झाले असून, पोलीस त्यांचा शोध घेत आहेत.

घरी जात असतानाच पाठलाग करत संपवले

मयत अमर जाधव हा रात्री 10 वाजण्याच्या सुमारास आपल्या दुचाकीवरून कुपवाड नजीक असणाऱ्या बामनोली येथील आपल्या घरी चालला होता. यावेळी दुचाकीवरून आलेल्या अज्ञात हल्लेखारांनी त्याचा पाठलाग करत त्याला रस्त्यावर अडवले. काही कळायच्या आतच जाधव याच्यावर एकामागून एक वार केले. यात त्याच्या डोक्याला गंभीर जखम होऊन तो जागीच ठार झाला. हत्येचे नेमके कारण अद्याप स्पष्ट झाले नसून, आर्थिक वादातून ही हत्या झाल्याचा संशय पोलिसांनी व्यक्त केला आहे. तपासाअंतीच हत्येचे नेमके कारण स्पष्ट होईल.

आरोपींच्या शोधासाठी पोलीस पथकं रवाना

कुपवाड एमआयडीसी पोलिसांनी हल्लेखारांच्या शोधार्थ पथके रवाना केली आहेत. मयत अमर जाधव उर्फ गुट्ट्या विरोधात कुपवाड पोलीस ठाण्यामध्ये विविध गुन्हे देखील दाखल आहेत. या खुनाच्या घटनेमुळे शहरामध्ये भितीचे वातावरण निर्माण झाले आहे. दरम्यान सांगली शहरामध्ये गेल्या आठ दिवसात तीन खुनाच्या घटना घडल्या आहेत. यावरुन गुन्हेगारांना कायद्याची भिती उरली नाही हेच दिसून येते.