रस्त्यावर एक व्यक्ती जखमी पडलाय, ज्याने फोन करून दिली माहिती तोच.. चुलतीमुळे गेला जीव ! नेमकं काय झालं ?
सोन्या उर्फ आदित्य संतोष वाल्हेकर यांनीच पोलिसांच्या नियंत्रण कक्षाला फोन करून एक व्यक्ती पडला असल्याची माहिती दिली होती. मात्र पोलिसांच्या तपासा दरम्यान जे उघड झालं..
चुलतीला आय लव्ह यू म्हणाल्याच्या रागातून एका इसमाचा निर्घृण खून करण्यात आला. हॉकी स्टिक अन् लाथा बुक्क्यांनी मारहाण करत त्याला संपवण्यात आलं. साईनाथ उर्फ खलीबली दत्तात्रय जानराव (वय 35) असे खून झालेल्या व्यक्तीचे नाव आहे. पुण्यातील चंदननगरच्या आंबेडकर वसाहतीमध्ये 12 ऑगस्ट रोजी हा धक्कादायक प्रकार घडला. याप्रकरणी दोघांना पोलिसांनी अटक केली आहे. सोन्या उर्फ आदित्य संतोष वाल्हेकर (वय 21) आणि समर्थ उर्फ पप्पू करण शर्मा (वय 22) अशी आरोपींची नावे आहेत.
नेमकं काय झालं ?
पोलीस हवलदार राहुल रामचंद्र गिरमे यांनी याप्रकरणी तक्रार दिली आहे. त्यानुसार चंदन नगर पोलीस ठाण्यात भारतीय न्याय संहिता १०३ (१)३(५) नुसार गुन्हा दाखल करण्यात आला होता.
वरिष्ठ पोलीस निरीक्षक सीमा ढाकणे यांनी दिल्या माहितीनुसार, चंदननगर परिसरात बेवारस मृतदेह असल्याची माहिती पोलिसांना मिळाली होती. त्यानंतर पोलिसांनी तातडीने घटनास्थळी धाव घेतली. ती मयत व्यक्ती म्हणजे साईनाथ उर्फ खलबली दत्तात्रय जानराव असल्याचे उघड झाले एवढंतच नव्हे तर त्याला दारूचे व्यसन असल्याचेही समोर आले.. पोलिसांनी पंचनामा करून मृतदेह पोस्टमार्टमसाठी ससून रुग्णालयात पाठवला होता. मात्र पोस्टमार्टम रिपोर्टमध्ये मारहाण झाल्याचे निष्पन्न झाले होते, त्यानुसार पोलिसांनी खुनाचा गुन्हा दाखल करून तपासाला सुरुवात केली..
चुलतीची छेड काढली म्हणून जीवच घेतला
पोलिसांनी अधिक तपास करत सखोल चौकशी केली असता सोन्या उर्फ आदित्य संतोष वाल्हेकर आणि समर्थ उर्फ पप्पू करण शर्मा या दोन्ही आरोपींची नावे समोर आली. मयत साईनाथ याने आरोपी सोन्या उर्फ आदित्य संतोष वालेकर याच्या चुलतीची छेड काढली होती. इतकंच नव्हे तर तो तिला आय लव्ह यू असं देखील म्हणाला होता. त्यामुळे भडकलेल्या आरोपींनी त्याला लाथा बुक्क्यांनी आणि हॉकी स्टिकने बेदम मारहाण केली. त्यात गंभीर जखमी झालेल्या साईनाथला ते तसेच सोडून निघून गेले होते. मात्र वर्मी घाव लागल्याने साईनाथचा मृत्यू झाला.
दरम्यान आरोपी सोन्या उर्फ आदित्य संतोष वाल्हेकर यांनीच पोलिसांच्या नियंत्रण कक्षाला फोन करून एक व्यक्ती पडला असल्याची माहिती दिली होती. मात्र पोलिसांच्या तपासा दरम्यान त्यानेच मित्राच्या मदतीने या व्यक्तीचा खून केल्याचे निष्पन्न झाले. पोलिसांनी दोघांनाही अटक केली असून अधिक तपास सुरू आहे.
