लेट पण थेट! पोलिसांनी ‘त्या’ सहा जणांना शिकवली कायमची अद्दल, पोलिसांच्या कारवाई गुन्हेगारांचे धाबे दणाणले…
नाशिकच्या औद्योगिक वसाहतीत भर दिवसा झालेल्या सिनेस्टाइल हल्ल्याने संपूर्ण राज्यात खळबळ उडाली होती. त्याप्रकरणी नाशिक पोलिसांनी मोठी कारवाई केली आहे.
नाशिक : नाशिकच्या सातपुर पोलिस ठाण्याच्या हद्दीतील कार्बन नाका परिसरात भरदिवसा गोळीबार आणि कोयत्याने वार केल्याची घटना घडली होती. यामध्ये समोरील गाडीला धडक देत हल्ला केला होता. ही संपूर्ण घटना खरंतर चित्रपटाला लाजवेल अशी आहे. त्यामुळे मोठ्या प्रमाणात सातपुर येथील हल्ल्याची घटना चर्चेचा विषय ठरली होती. संशयित आरोपी हे अनेक दिवस फरार असल्याने पोलिसांना चकवा देत होते. पोलिसांच्या हाती लागल्यानंतर वर्चस्व वादातून हल्ला झाल्याची कबुली संशयित आरोपींनी दिली होती. त्यानंतर नाशिकच्या शहर पोलिसांनी तपास करत असतांना त्यांच्यावर गंभीर स्वरूपाचे गुन्हे दाखल असल्याचे समोर आले होते. त्यानंतर नाशिक पोलिसांनी संशयित आरोपींना चांगलाच दणका दिला आहे.
नाशिक शहर पोलिसांनी सहा जणांवर मोक्काची कारवाई केली आहे. महाराष्ट्र संघटित गुन्हेगारी प्रतिबंधित कलमान्वये ही कारवाई करण्यात आल्याने शहरातील गुन्हेगारी विश्वात खळबळ उडाली आहे. बहुचर्चित हल्ल्यातील आरोपींवर थेट मोक्काची कारवाई केली आहे.
यामध्ये आशिष राजेंद्र जाधव, भूषण किसन पवार, रोहित मंगलदास अहिरराव, गणेश राजेंद्र जाधव, किरण दत्तात्रय चव्हाण, सोमनाथ झांजर यांच्यावर मोक्काची कारवाई करण्यात आली आहे. यातील बहुतांश जणांवर गंभीर गुन्हे दाखल आहेत.
मार्च महिन्यातील 19 तारखेला पूर्ववैमनस्यातून संशयित आरोपींनी गाडी चालवत असतांना कार्बन नाका परिसरात तपन जाधव यांच्यावर गोळीबार केला होता. त्याबाबत सोबत असलेल्या राहुल पवार याने फिर्याद दिली होती. त्यानंतर पोलिसांनी कारवाई केली आहे.
सातपुर पोलिस ठाण्याचे पोलिस निरीक्षक पंकज भालेराव यांनी ही करवाई केली आहे. यामध्ये लेट पण थेट मोक्काचीच कारवाई झाल्याने नाशिकमध्ये पोलिसांनी गुन्हेगारांना दिलेल्या दणक्याची जोरदार चर्चा होऊ लागली आहे.
नाशिक शहरात पंचवटी नंतर सातपुर आणि लागलीच अंबड परिसरात गोळीबाराची घटना घडल्यानंतर नाशिक शहरात पोलिस काय करताय असा सवाल उपस्थित केला जात होता. त्यानंतर पोलिसांनी ही कारवाई केली आहे.