जमिनीचा वाद टोकाला गेला, जावयांनीच चुलत सासऱ्याचा काटा काढला !

सातारा / संतोष नलावडे : जमिनीच्या वादातून दोघा जावयांनीच चुलत सासऱ्याची गोळ्या झाडून हत्या केल्याची खळबळजनक घटना आज साताऱ्यात घडली. सातारा जिल्ह्यातल्या कोरेगाव तालुक्यातील वाघोली येथे आज सायंकाळी सातच्या सुमारास ही घटना घडली. सुनील शंकर भोईटे असे हत्या करण्यात आलेल्या सासऱ्याचे नाव आहे. सासऱ्याची हत्या केल्यानंतर आरोपी जावई स्वतःहून पोलीस ठाण्यात हजर झाले. रवी यादव आणि सुनील यादव अशी आरोपी जावयांची नावे आहेत. याप्रकरणी वाठार पोलिसात हत्येचा गुन्हा दाखल करण्यात आला असून, पोलीस पुढील तपास करत आहेत.

वडिलोपार्जित जमिनीवरुन सासरे-जावयांमध्ये वाद होता

सुनील भोईटे यांचा भाऊ नामदेव भोईटे यांना दोन विवाहित मुली आहेत. त्यांना मुलगा नाही. रवी यादव याने नामदेव यांच्या हिस्स्याची जमीन विकली असल्याची प्राथमिक माहिती आहे. या वडिलोपार्जित जमिनीसंदर्भात सुनील भोईटे यांनी न्यायालयात दावा दाखल आहे. यावरून नामदेव भोईटे यांचे जावई आणि सुनील भोईटे यांच्यात वाद झाले होते.

सासरे घरी जात असताना वाटेत अडवून गोळ्या झाडल्या

आज सायंकाळी सात वाजण्याच्या सुमारास सुनील भोईटे आणि त्यांचा मुलगा दुचाकीवरून घराकडे चालले होते. यावेळी नामदेव यांचे जावई रवी यादव आणि सुनिल यादव या दोघांनी वाघोली येथे त्यांना वाटेत अडवून भोईटे यांच्यावर पिस्तूल रोखले. यावेळी भोईटे यांच्या मुलाने आपल्या वडिलांना मारू नका म्हणून हात जोडून विनवण्याही केल्या. मात्र तरीही रवी यादव याने भोईटे यांच्या पोटात आणि छातीत तीन गोळ्या घातल्या.

गोळीबारानंतर आरोपी स्वतः पोलीस ठाण्यात हजर

सुनील भोईटे यांना तातडीने पिंपोडे बुद्रुकच्या ग्रामीण रुग्णालयात दाखल करण्यात आले. मात्र तत्पूर्वीच भोईटे यांचा मृत्यू झाला. रवी यादव आणि सुनिल यादव यांचे मूळ गाव सोळशी हे असून, ते सध्या पुणे येथे वास्तव्यास आहेत. गोळीबाराची घटना घडल्यानंतर दोघेही स्वतःहून वाठार पोलीस ठाण्यात हजर झाले असल्याचे पोलिसांनी सांगितले. घटनेसंदर्भात वाठार पोलीस अधिक तपास करीत आहेत. मात्र या घटनेमुळे वाघोली परिसरात काही वेळासाठी तणावाचे वातावरण निर्माण झाले होते.