रश्मिका मंदानाच्या चाहत्यांना धक्का! शूटिंगदरम्यान अभिनेत्रीला गंभीर दुखापत; शूटिंग थांबले

मिळालेल्या माहितीनुसार, एका चित्रपटाच्या शूटिंगदरम्यान सुरू असलेल्या अवघड डान्स सिक्वेन्स आणि हाय-ऑक्टेन अॅक्शन सीनचे चित्रीकरण करत असताना रश्मिका जखमी झाली. हा अपघात अचानक घडल्याने शूटिंग सेटवर काही काळ गोंधळाचे वातावरण निर्माण झाले. त्यानंतर तातडीने डॉक्टरांच्या टीमला बोलवण्यात आले आणि तिच्यावर प्राथमिक उपचार करण्यात आले.

वैद्यकीय तपासणीनंतर डॉक्टरांनी दिलेल्या अहवालानुसार, रश्मिकाच्या कंबरेच्या खालच्या भागातील टेंडनचे पूर्णपणे डिटॅचमेंट झाले आहे. डॉक्टरांच्या म्हणण्यानुसार, अशा प्रकारची गंभीर दुखापत सहसा व्यावसायिक खेळाडूंना किंवा अत्यंत शारीरिक मेहनत घेणाऱ्या व्यक्तींना होते. सलग कठीण डान्स स्टेप्स आणि अॅक्शन सीन्समुळे तिच्या स्नायूंवर मोठा ताण आल्याने ही दुखापत झाल्याचे सांगितले जात आहे.

दीड महिना पूर्ण बेड रेस्ट घेण्याचा सल्ला

दुखापतीची तीव्रता लक्षात घेता डॉक्टरांनी रश्मिकाला पुढील सहा आठवडे म्हणजेच सुमारे दीड महिना पूर्ण बेड रेस्ट घेण्याचा सल्ला दिला आहे. या काळात कोणत्याही प्रकारचा शारीरिक ताण टाळण्याच्या सूचना देण्यात आल्या असून, योग्य उपचार आणि फिजिओथेरपीद्वारे तिच्या प्रकृतीत सुधारणा होण्याची अपेक्षा व्यक्त करण्यात आली आहे.

रश्मिका सध्या ‘रणबली’ आणि ‘मैसा’ यांसारख्या बहुचर्चित चित्रपटांच्या शूटिंगमध्ये व्यस्त होती. मात्र, या अनपेक्षित दुखापतीमुळे संबंधित चित्रपटांच्या शूटिंग शेड्यूलमध्ये मोठे बदल करावे लागणार असल्याचे बोलले जात आहे. निर्मात्यांसाठीही ही परिस्थिती आव्हानात्मक ठरणार असून, पुढील चित्रीकरणाचे नियोजन नव्याने करावे लागण्याची शक्यता आहे.

सध्या चित्रपटांच्या टीमकडूनही रश्मिकाच्या प्रकृतीवर लक्ष ठेवले जात असून, योग्य उपचार आणि पुरेशा विश्रांतीनंतर ती पुन्हा एकदा नव्या जोमाने आणि दुप्पट उत्साहाने शूटिंग सेटवर परत येईल असा विश्वास व्यक्त करण्यात येत आहे.