Amitabh Bachchan: मी त्यांची माफी मागतो..; वचन दिलं अन् कामच केलं नाही, अखेर बिग बींनी सर्वांसमोर कबूल केली चूक

Amitabh Bachchan Kaun Banega Crorepati: ‘कौन बनेगा करोडपती १८’ या क्विझ रिॲलिटी शोमध्ये एका स्पर्धकाशी बोलताना, बॉलिवूडचे ज्येष्ठ अभिनेते अमिताभ बच्चन आपल्या वडिलोपार्जित गावाच्या आठवणीने भावूक झाले. त्यांनी आपल्या गावात मुलांसाठी ग्रंथालय उघडण्यास झालेल्या विलंबाबद्दल दिलगिरी व्यक्त केली आणि लवकरच ते उघडण्याचे आश्वासन दिले.

‘केबीसी’च्या एका एपिसोडमध्ये, स्पर्धक चंद्र प्रकाश तिवारी यांनी आपण प्रतापगडचे असल्याचे उघड केले होते. बाबूपट्टी हे नाव ऐकताच अमिताभ भावूक झाले आणि त्यांनी सांगितले की, हे गाव त्यांच्या पूर्वजांचे जन्मस्थान होते आणि त्यांचे वडील, प्रसिद्ध हिंदी कवी हरिवंश राय बच्चन, याच गावाचे रहिवासी होते. बिग बी म्हणाले, “बाबूपट्टी हे आमच्या पूर्वजांचे जन्मस्थान होते आणि बाबुजी तिथूनच आले होते.”

अमिताभ म्हणाले, “जेव्हा जयाजी आमच्यासोबत गावाला भेट द्यायला आल्या होत्या, तेव्हा त्यांनी या गावात मुलांसाठी ग्रंथालय उघडणार असं म्हणाल्या होत्या. जेव्हा जयाजी आमच्यासोबत गावात गेल्या होत्या, तेव्हा त्यांनी पाहिले की गावातील मुलांकडे शिकण्यासाठी योग्य जागा नाही. यानंतर, आम्ही दोघांनी मिळून गावात एक ग्रंथालय बांधण्याची योजना आखली. ग्रंथालयाची इमारत तयार असली तरी, काही अडथळ्यांमुळे सर्व सुविधा बसवण्यात आलेल्या नाहीत आणि ते अद्याप सुरू झालेले नाही.”

बिग बी म्हणाले, “काळजी करू नका, ग्रंथालय लवकरच सुरू होईल. विलंबाबद्दल माफी असावी आणि ग्रंथालय लवकरच सुरू करु, आम्ही बाबू पट्टीच्या लोकांची माफी मागतो. आम्ही केबीसीच्या मंचावरून तुम्हा सर्वांना सांगू इच्छितो की, काळजी करू नका, ग्रंथालय लवकरच सुरू होईल. इमारत पूर्ण झाली आहे आणि आता तिथे आवश्यक साहित्य आणि पुस्तके ठेवली जातील जेणेकरून मुले तिथे अभ्यास करू शकतील.”

जया बच्चन आणि माजी खासदार अमर सिंह यांनी २००६ मध्ये या ग्रंथालयाचे उद्घाटन केले होते. २० वर्षांपूर्वी, २००६ मध्ये, जया बच्चन आणि माजी खासदार अमर सिंह यांनी डॉ. हरिवंश राय बच्चन यांच्या स्मरणार्थ ‘डॉ. हरिवंश राय बच्चन मेमोरियल लायब्ररी’चे उद्घाटन केले होते. उद्घाटनानंतर, देखभालीच्या अभावामुळे आणि काही अडथळ्यांमुळे ग्रंथालय सुरळीतपणे चालू शकले नाही आणि त्याच्या इमारतीची दुरवस्था झाली.’