इफ्तार पार्टीत दिसून आलं अरबाज-शुराचं प्रेम; व्हिडीओवर कमेंट्सचा वर्षाव
अभिनेता अरबाज खान आणि त्याची पत्नी शुरा खान हे नुकतेच इफ्तार पार्टीसाठी मोहम्मद अली रोड याठिकाणी पोहोचले होते. इफ्तार पार्टीदरम्यान अरबाज आणि शुरा यांच्यातील प्रेम सहज दिसून आलं. या दोघांचे व्हिडीओ सध्या सोशल मीडियावर व्हायरल होत आहेत.
अभिनेता अरबाज खान आणि त्याची पत्नी शुरा खान हे लग्न झाल्यापासून अनेकदा सोशल मीडियावर चर्चेत आले आहेत. अरबाज आणि शुरा आता पापाराझींची आवडती जोडी ठरली आहे. कॅफे असो, रेस्टॉरंट असो किंवा इतर कुठेही… या दोघांची केमिस्ट्री पापाराझी त्यांच्या फोटो आणि व्हिडीओंमध्ये कैद करतात. नुकतेच हे दोघं मुंबईतील प्रसिद्ध मोहम्मद अली रोड याठिकाणी इफ्तार पार्टीसाठी आले होते. त्याचे व्हिडीओ सध्या सोशल मीडियावर व्हायरल होत आहेत. अरबाज आणि शुरा यांनी रोजा सोडला आणि त्यानंतर एकमेकांना घास भरवला. इतकंच नव्हे तर यावेळी शुरा अरबाजची अत्यंत प्रेमाने काळजी घेताना दिसली. या व्हिडीओंवर नेटकऱ्यांकडून विविध प्रतिक्रिया येत आहेत.
मंगळवारी पापाराझींनी इन्स्टाग्रामवर अरबाज आणि शुराचे काही व्हिडीओ पोस्ट केले. अरबाज हा इंडस्ट्रीतील त्याच्या काही सेलिब्रिटींसोबत इफ्तार पार्टीत सहभागी झाला होता. त्याच्यासोबत पत्नी शुरासुद्धा होती. रमजानच्या महिन्यात मुंबईतील मोहम्मद अली रोडवर प्रचंड गर्दी असते. अनेकजण तिथे विविध पदार्थ खाण्यासाठी आणि इफ्तार पार्टीसाठी येतात. अशातच जेव्हा अरबाज तिथे शुरासोबत पोहोचला, तेव्हा या दोघांभोवती लोकांनी प्रचंड गर्दी केली होती. या गर्दीतून शुराला वाचवत अरबाजने पुढे नेल्याचंही व्हिडीओत पहायला मिळतंय.
आणखी एका व्हिडीओमध्ये अरबाजच्या तोंडावर काही लागलं असताना शुरा अत्यंत प्रेमाने तिच्या हाताने पुसताना दिसतेय. इफ्तार पार्टीदरम्यान दोघं एकमेकांची खास काळजी घेताना दिसले. या दोघांमधील प्रेम आणि काळजी या व्हिडीओत सहज पहायला मिळतेय. या व्हिडीओवर कमेंट करताना काहींनी या जोडीचं कौतुक केलंय तर काहींनी त्यांच्यावर टीका केली आहे. ‘पती-पत्नी कमी आणि बापलेकीची जोडी जास्त वाटतेय’, असं एकाने लिहिलंय. तर ‘हा दिखावा बंद करा’, असं दुसऱ्या युजरने म्हटलंय.
गेल्या वर्षी 24 डिसेंबर रोजी अरबाज खानने शुराशी निकाह केली. बहीण अर्पिताच्या घरीच हा छोटेखानी कार्यक्रम पार पडला होता. या निकाहला कुटुंबीय आणि मोजके पाहुणे उपस्थित होते. शुरा खान ही बॉलिवूडमधील प्रसिद्ध मेकअप आर्टिस्ट आहे. तिचा इन्स्टाग्राम अकाऊंट प्रायव्हेट असून तिचे 13.2 हजार फॉलोअर्स आहेत. शुराने अभिनेत्री रवीना टंडन आणि तिची मुलगी राशा थडानीसाठी मेकअप आर्टिस्ट म्हणून काम केलंय. अरबाज आणि शुराची पहिली भेट ‘पटना शुक्ला’ या चित्रपटाच्या सेटवर झाली होती.
