नास्तिक जावेद अख्तर यांच्या करिअरमधील सर्वांत कठीण गाणं; देवासाठीचं हे गाणं ऐकून आजही डोळ्यात येईल पाणी

अभिनेता आमिर खानचा ‘लगान’ हा चित्रपट प्रदर्शित होऊन 25 वर्षे पूर्ण झाली आहेत. मात्र या चित्रपटाच्या आठवणी आजही अनेकांच्या मनात कायम आहेत. 2001 मध्ये प्रदर्शित झालेला हा चित्रपट बॉक्स ऑफिसवर ब्लॉकबस्टर ठरला होता. यातील गाणी, कलाकारांचं दमदार अभिनय आणि ‘लगान’मधली प्रत्येक गोष्ट आयकॉनिक मानले जातात. या चित्रपटातील गाणी दिग्गज गीतकार जावेद अख्तर यांनी लिहिली होती. ‘लगान’मधील सर्व गाणी अख्तर यांनीच लिहिली होती आणि या गाण्यांना प्रेक्षकांकडून जबरदस्त प्रतिसाद मिळाला होता. मात्र या चित्रपटातील एक गाणं लिहिण्यासाठी जावेद अख्तर यांना बऱ्याच समस्यांचा सामना करावा लागला होता. नुकत्याच एका कार्यक्रमात त्यांनी याविषयीचा खुलासा केला.

‘लगान’ या चित्रपटातील ‘ओ पालनहारे’ हे गाणं लिहिणं त्यांच्यासाठी खूप कठीण असल्याचं अख्तर यांनी सांगितलं. या गाण्याने त्यांच्या करिअरमध्येही बऱ्याच अडचणी घेऊन आला होता. नास्तिक असतानाही देवासमोर विनवणी करणारं हे गाणं लिहिताना त्यांना स्वत:च्या मनात संपूर्ण समर्पित भावना जागृत करावी लागली, असं ते म्हणाले. “जेव्हा कधी लोक मला विचारतात की आजवरच्या करिअरमध्ये कोणतं गाणं लिहिणं तुमच्यासाठी सर्वांत कठीण होतं, तेव्हा मी नेहमीच म्हणेन ती ‘ओ पालनहारे’. ए. आर. रेहमान साहेब यांनी या गाण्याला इतक्या शुद्ध भक्तीचं संगीत दिलं की ऐकताच कोणालाही समजेल की हे अध्यात्मिक गाणं आहे. मी स्वत: नास्तिक आहे, तरीसुद्धा मला देवाप्रती समर्पणाची भावना मनात कुठेतरी शोधावी लागली. अशी गाणी चलाखीने किंवा कोणतीही युक्ती वापरून लिहिले जाऊ शकत नाहीत. त्यासाठी फक्त मन स्वच्छ, पवित्र आणि निर्मळ असावं लागतं”, असं अख्तर यांनी सांगितलं.

या कार्यक्रमात ए. आर. रेहमानसुद्धा उपस्थित होते. जावेद अख्तर यांचं हे वक्तव्य ऐकून ते म्हणाले, “हे गाणं टाइमलेस बनावं अशी माझी इच्छा होती आणि नशिबाने तसंच घडलं.” आमिरच्या ‘लगान’ चित्रपटातील गाणी प्रचंड गाजली आणि ही गोष्ट त्याच्या साऊंड ट्रॅकच्या विक्रीवरून स्पष्ट होते. बॉलिवूडच्या इतिहासातील हा सर्वांत मोठ्या ऑडिओ हिट्सपैकी एक आहे. त्याच्या 35 लाखांहून अधिक रेकॉर्ड्सची विक्री झाली आहे.