प्रभासच्या चित्रपटासाठी महानायकाचा आवाज; ‘राधेश्याम’मध्ये बिग बींचा व्हॉईसओव्हर
येत्या ११ मार्च रोजी हा चित्रपट (Radhe Shyam) तेलुगू, हिंदी, तमिळ, कन्नड आणि मल्याळम अशा पाच भाषांमध्ये प्रदर्शित होणार आहे.
‘बाहुबली’ फेम अभिनेता प्रभास (Prabhas) आणि अभिनेत्री पूजा हेगडे (Pooja Hegde) यांच्या आगामी ‘राधेश्याम’ (Radhe Shyam) या चित्रपटाची प्रचंड उत्सुकता प्रेक्षकांमध्ये आहे. या चित्रपटाच्या हिंदी व्हर्जनसाठी बॉलिवूडचे महानायक अमिताभ बच्चन (Amitabh Bachchan) यांनी आवाज दिला आहे. मंगळवारी निर्मात्यांनी याबाबतची माहिती सोशल मीडियाद्वारे दिली. राधा कृष्ण कुमार दिग्दर्शित हा रोमँटिक चित्रपट विविध भाषांमध्ये प्रेक्षकांच्या भेटीला येणार आहे. युरोपमधील १०७०चा काळ यामध्ये दाखवण्यात येणार असून प्रभास विक्रमादित्य ही भूमिका साकारणार आहे. तर पूजा हेगडे ही प्रेरणाच्या भूमिकेत आहे. विक्रमादित्य आणि प्रेरणा यांची अनोखी प्रेमकथा प्रेक्षकांना या चित्रपटात पहायला मिळणार आहे. ‘राधेश्याम’ या चित्रपटासाठी एका सुपरिचित आवाजाची गरज होती आणि बिग बींशिवाय चांगला आवाज कुणाचा मिळाला नसता, असं दिग्दर्शक कुमार म्हणाले.
“१९७०च्या दशकातील कथानक या चित्रपटात दाखविण्यात आली आहे. चित्रपटाचा दर्जा आणि कथानकाची गरज पाहता आम्हाला देशभरात प्रसिद्ध असलेल्या आवाजाची गरज होती. तो आवाज अमिताभ बच्चन यांच्याशिवाय दुसरा कुठला असूच शकत नाही. प्रत्येकजण त्याच्या आवाजाशी परिचित आहे आणि सर्वांत महत्त्वाचं म्हणजे प्रत्येकजण त्या आवाजावर प्रेम करतो, त्याचा आदर करतो. बिग बींचा व्हॉईसओव्हर मिळाल्याने आम्ही खूप खूश आहोत”, अशी भावना दिग्दर्शकांनी व्यक्त केली.
Thank you Shahenshah @SrBachchan sir for the Hindi voiceover of #RadheShyam. #Prabhas @hegdepooja @director_radhaa @UV_Creations @TSeries @GopiKrishnaMvs @AAFilmsIndia @RadheShyamFilm #RadheShyamOnMarch11 pic.twitter.com/xrqZWGXoj1
— Radha Krishna Kumar (@director_radhaa) February 22, 2022
यानिमित्ताने प्रभास आणि अमिताभ बच्चन हे दुसऱ्यांदा एकमेकांसोबत काम करणार आहेत. याआधी ‘प्रोजेक्ट के’साठी दोघांनी एकत्र काम केलं होतं. हा चित्रपट सध्या प्रॉडक्शनच्या टप्प्यात आहे. राधेश्याम या चित्रपटात प्रभास आणि पूजाशिवाय भाग्यश्री, मुरली शर्मा, सचिन खेडेकर, प्रियादर्शी, सेशा छेत्री, कुणाल रॉय कपूर आणि सत्यान यांच्या भूमिका आहेत. गुलशन कुमार आणि टी सीरिज प्रस्तुत या चित्रपटाची निर्मिती युव्ही क्रिएशन्स, भुषण कुमार, वामसी आणि प्रमोद यांनी केली आहे. येत्या ११ मार्च रोजी हा चित्रपट तेलुगू, हिंदी, तमिळ, कन्नड आणि मल्याळम अशा पाच भाषांमध्ये प्रदर्शित होणार आहे.