पती आहे की हैवान ? पत्नीच्या डोक्यात मारला हातोडा, स्क्रू ड्रायव्हरनेही वार; कारण ऐकाल तर…

घरी पत्नीने वेळेवर नाश्ता बनवला नाही म्हणून पतीने तिच्या डोक्यात हातोडा मारल्याचा अत्यंत धक्कादायक आणि गंभीर प्रकार मुंबईत घडल्याचे उघडकीस आले आहे. कुर्ला येथे घडलेल्या घटनेमुळे एकच खळबळ माजली आहे. धक्कादायक गोष्ट म्हणजे, आरोपी पती एवढ्यावरच थांबला नाही तर त्याने त्याच्या पत्नीवर चाकू आणि स्क्रू ड्रायव्हरनेही हल्ला करून तिला गंभीर जखमी केले. या हल्ल्यात वाईटरित्या जखमी झालेल्या ३४ वर्षांच्या महिलेला कुर्ल्यातील भा.भा. रुगणालयाच्या अतिदक्षता विभागात दाखल करण्यात आले असून तिच्यावर उपचार सुरू आहेत. आरोपी पतीविरोधात कुर्ला पोलिस स्टेशनमध्ये हत्येच्या प्रयत्नाचा गुन्हा दाखल करण्यात आला आहे. मोहम्मद फय्युम खान (वय 38) असे आरोपीचे नाव असून गुडिया (वय 34)असे जखमी महिलेचे नाव आहे.

पोलिसांकडून मिळालेल्या माहितीनुसार, जखमी महिला गुडिया ही कुर्ला पोलीस ठाण्याच्या पाठीमागे असलेल्या गणेश बाग लेन येथे पतीसोबत रहात होती. गुरूवारी गुडिया हिने वेळेवर नाश्ता बनवला नाही, त्यामुळे तिचा पती चिडला आणि त्याने वाद घालण्यास सुरुवात केली. वाद वाढला आणि संतापाच्या भरात फय्युमने घरातील शिलाई मशीनच्या शेजारी ठेवलेला हातोडा उचलून गुडिया हिच्या डोक्यात जोरदार प्रहार केला. तो एवढ्यावरच थांबला नाही तर त्याने घरातील चाकू घेऊन गुडिया हिच्या गळ्यावर तीन वार केले. एवढेच नव्हे तर त्याने घरातील स्क्रू ड्रायव्हरनेबी पत्नीच्या डोक्यावर मारलं. यामुळे गुडिया ही गंभीर जखमी झाली.

या हल्ल्यात जखमी झालेल्या गुडिया यांना तात्काळ कुर्ला येथील भा.भा. रुग्णालयात दाखल करण्यात आले. तेथील अतिदक्षता विभागात तिच्यावर उपचार सुरू आहेत. हल्ल्यानंतर पोलिसांनी गुडिया खान हिचा जबाब नोंदवला. जबाबात तिने पतीने आपल्यावर हल्ला केल्याचे सांगितले. त्यानंतर पोलिसांनी याप्रकरणी हत्येच्या प्रयत्न व धमकावल्याप्रकरणी फय्युम खानविरोधात गुन्हा दाखल केला. याप्रकरणी अधिक तपास सुरू आहे.