Urvashi Rautela: दोन बायका, चार मुलं असलेल्या प्रसिद्ध गायकने लग्नासाठी केलं होतं प्रपोज; उर्वशी रौतेलाचा खुलासा

बॉलिवूड अभिनेत्री उर्वशी रौतेला (Urvashi Rautela) हिची गणना सध्याच्या काळातील सर्वात सुंदर अभिनेत्रींमध्ये केली जाते. तिच्या आकर्षक लूकचे आणि फॅशनचे असंख्य चाहते आहेत. सोशल मीडियावरही तिचा मोठा चाहतावर्ग आहे. नुकत्याच दिलेल्या एका मुलाखतीदरम्यान उर्वशीने तिला आलेल्या एका लग्नाच्या प्रस्तावाचा (Marriage Proposal) खुलासा केला. एका मीडिया हाऊसला दिलेल्या मुलाखतीत जेव्हा तिला विचारण्यात आलं की तिला कधी लग्नाचा विचित्र प्रस्ताव आला आहे का? यावर उर्वशीने होकारार्थी उत्तर दिलं. इजिप्तमधील एका प्रसिद्ध गायकने (Egyptian singer) तिला लग्नासाठी प्रपोज केलं होतं, असं तिने सांगितलं. पण तिने साफ नकार दिला होता. उर्वशीने नकारामागचं कारणसुद्धा सांगितलं.

“आमच्यात सांस्कृतिकदृष्ट्या खूप फरक आहे, त्यामुळे मला तो प्रस्ताव नाकारावा लागला. शिवाय त्या गायकाला दोन बायका आणि चार मुलं आहेत,” असं ती म्हणाली. लग्नाच्या निर्णयाबाबत तिने पुढे सांगितलं, “मला अशा अनेक प्रस्तावांना सामोरं जावं लागलं आहे, परंतु अशा मोठ्या निर्णयांसाठी अनेक गोष्टींची काळजी घ्यावी लागते. विशेषतः महिलांना खूप विचार करावा लागतो. कारण ते तितकं सोपं नसतं.” या मुलाखतीत तिने लग्नाचा प्रस्ताव देणाऱ्या त्या गायकाचं नाव मात्र उघड केलं नाही. परंतु तो इजिप्तचा आहे आणि दुबईमध्ये तिला भेटला होता, असं तिने म्हटलं.

उर्वशीच्या या प्रस्तावाबद्दल कळताच सोशल मीडियावर नेटकऱ्यांनी गायकाबाबत अंदाज बांधण्यास सुरुवात केली. या व्हिडिओवर कमेंट करताना एका व्यक्तीने इजिप्शियन गायक मोहम्मद रमजानचं नाव लिहिलं आहे. उर्वशी 2021 मध्ये या गायकासोबत एका आंतरराष्ट्रीय संगीत व्हिडिओमध्ये दिसली आहे. व्हर्सेस बेबी असं या गाण्याचं नाव होतं.