47 सेकंदाचा टीझरने उडवली सर्वांची झोप, प्रेक्षक पुन्हा-पुन्हा बघत आहेत या चित्रपटाचा टीझर, लवकरच ZEE5 वर….

मनमिळावू अभिनयामुळे प्रेक्षकांच्या मनात घर करणारा अभिनेता जितेंद्र कुमार आता एका पूर्णपणे वेगळ्या आणि गूढ भूमिकेत प्रेक्षकांसमोर येणार आहे. त्याच्या आगामी ‘डालिंब’ या सायकोलॉजिकल थ्रिलर चित्रपटाचा अवघ्या 47 सेकंदांचा टीझर प्रदर्शित झाला असून, सोशल मीडियावर त्याची जोरदार चर्चा सुरू आहे. विशेष म्हणजे, टीझरमध्ये एकही संवाद नसतानाही त्यातील दृश्यरचना, पार्श्वसंगीत आणि रहस्यमय वातावरण प्रेक्षकांची उत्सुकता शिगेला पोहोचवत आहे.

‘पंचायत’मधील ‘सचिवजी’ आणि ‘कोटा फॅक्टरी’तील ‘जीतू भैया’ या भूमिकांमुळे जितेंद्र कुमारला मोठी लोकप्रियता मिळाली. मात्र ‘डालिंब’मध्ये त्याने आपल्या या प्रतिमेला पूर्णपणे वेगळी भूमिका स्वीकारली आहे.

या चित्रपटात तो ‘सूरज’ नावाच्या एका लोककलाकाराची भूमिका साकारत आहे. सूरज हा आपल्या भूतकाळातील काही भीषण घटनांमुळे मानसिक संघर्ष आणि खोल भावनिक गुंतागुंतीत अडकलेला आहे. त्याच्या आयुष्यातील या अंधाऱ्या बाजूची झलक टीझरमध्ये पाहायला मिळते.

रहस्य, भीती आणि सस्पेन्सने भरलेला टीझर

टीझरची सुरुवात अतिशय गडद आणि रहस्यमय वातावरणात होते. त्यानंतर एका घाबरलेल्या लहान मुलीचे दृश्य, जीवाच्या आकांताने पळणारे लोक, पोलिसांच्या सायरनचा आवाज आणि शेवटी दिसणारा पारंपरिक सांस्कृतिक मुखवटा या सर्व दृश्यांमुळे कथानकाविषयी अनेक प्रश्न निर्माण होतात.

संवादांचा वापर न करता केवळ दृश्यांमधून तणाव निर्माण करण्याचा प्रयत्न करण्यात आला असून, त्यामुळे प्रेक्षकांमध्ये चित्रपटाबद्दलची उत्सुकता अधिक वाढली आहे. अनेकजण हा टीझर पुन्हा पुन्हा पाहत असून त्यातील प्रत्येक फ्रेममधील संकेत शोधण्याचा प्रयत्न करत आहेत.

OTT वर होणार प्रीमियर

‘डालिंब’चा प्रीमियर ZEE5 या OTT प्लॅटफॉर्मवर होणार आहे. मात्र, टीझरसोबत चित्रपटाच्या प्रदर्शनाची अधिकृत तारीख अद्याप जाहीर करण्यात आलेली नाही. त्यामुळे चाहत्यांना रिलीज डेटच्या घोषणेची प्रतीक्षा आहे.

अवघ्या 47 सेकंदांच्या टीझरनेच ‘डालिंब’ने प्रेक्षकांचे लक्ष वेधून घेतले आहे. जितेंद्र कुमारचा याआधी कधीही न पाहिलेला गडद आणि रहस्यमय अवतार, प्रभावी दृश्यरचना आणि सस्पेन्सने भरलेले कथानक यामुळे हा चित्रपट OTT वरील बहुप्रतीक्षित सायकोलॉजिकल थ्रिलर ठरण्याची शक्यता व्यक्त केली जात आहे.