अक्षय खन्नासोबत मी काम करणार नाही, तो खूपच..; फराह खानने सांगितला धक्कादायक किस्सा

बॉलिवूडमधील कलाकारांच्या अभिनयाइतकीच त्यांच्या सेटवरील वागणुकीचीही चर्चा होत असते. आता अभिनेता अक्षय खन्ना याच्याबाबत दिग्दर्शिका आणि कोरिओग्राफर फराह खानने केलेला एक खुलासा चर्चेत आला आहे. एका पॉडकास्टमध्ये फराह खानने अक्षयसोबत काम करण्याचा अनुभव सांगताना, करिअरच्या सुरुवातीच्या काळात त्याच्यासोबत काम करणं खूप कठीण असल्याचं म्हटलं आहे. फराह खानने कोरिओग्राफर्स बोस्को आणि सीझर यांच्या ‘डान्स मस्ती’ पॉडकास्टमध्ये हा किस्सा सांगितला आहे. तिला सेटवर कोणता अभिनेता सर्वात कठीण वाटला, असा प्रश्न विचारण्यात आला होता. यावेळी तिने अक्षय खन्नाचं नाव घेतलं.

1990च्या दशकात अक्षयसोबत काम करताना मला अनेक अडचणी जाणवत होत्या. त्या काळात तो खूप चिडचिड करायचा आणि शूटिंगदरम्यान उभं राहायलाही त्याची तयारी नसायची. त्यामुळे गाण्यांची कोरिओग्राफी करताना मला खूप त्रास व्हायचा, असं फराह खान म्हणाल्या. अक्षयच्या या वागण्यामुळे फराहने वैतागून असंही ठरवलं होतं की, जर एखाद्या गाण्यात अक्षय खन्ना असेल तर ती त्या गाण्याची कोरिओग्राफी करणार नाही. ‘डोली सजा के रखना’ आणि ‘लावारिस’ यांसारख्या चित्रपटांमध्ये तिने अक्षयसोबत काम केलं होतं. मात्र त्या अनुभवांनंतर तिचं मत काही काळासाठी नकारात्मक झालं होतं.

फराहने मात्र अक्षयबद्दल कायमचं मत बनवलं नाही. पुढे त्याच्या कामाच्या पद्धतीत झालेला बदल तिने स्वतः अनुभवला. 2001 मध्ये आलेल्या ‘दिल चाहता है’ या चित्रपटानंतर अक्षयच्या वागण्यात मोठा बदल झाल्याचं फराहने सांगितलं. त्यानंतर त्याच्यासोबत काम करणं अधिक सहज झालं आणि त्याच्याबद्दलचा तिचा दृष्टिकोनही बदलला. यानंतर फराह आणि अक्षय यांनी पुन्हा एकत्र काम केलं.

गेल्या काही काळात अक्षय खन्ना आपल्या अभिनयामुळे पुन्हा एकदा चर्चेत आला आहे. विशेषतः ‘धुरंधर’मधील त्याच्या भूमिकेचं कौतुक झालं. या चित्रपटात त्याने रेहमान डकैतची भूमिका साकारली होती. या पॉडकास्टदरम्यान सीझरने फराहला विचारलं, “कोणत्या अभिनेत्यासाठी तुला सर्वांत जास्त मेहनत करावी लागली?” तेव्हा फराहने आधी त्याला स्वत:चं उत्तर देण्यासाठी सांगितलं. तेव्हा सीझरने अभिषेक बच्चनचं नाव घेतलं. त्यावर फराहने उत्तर दिलं की, “अभिषेक खूप चांगला डान्सर आहे.”