महाशिवरात्रीनिमित्त ‘जय जय स्वामी समर्थ’, ‘आई तुळजाभवानी’ मालिकांचे विशेष भाग
जय जय स्वामी समर्थ आणि आई तुळजाभवानी या मालिकांचे महाशिवरात्री विशेष भाग येत्या 26 फेब्रुवारी रोजी अनुक्रमे रात्री 8 आणि 9 वाजता कलर्स मराठीवर प्रसारित होणार आहेत. महादेवांचे हे विलोभनीय रूप आणि आई तुळजाभवानी अवतार कार्याशी त्याचा असलेला संबंध आवर्जून पाहण्यासारखा आहे.
‘कलर्स मराठी’ वाहिनीवर ‘जय जय स्वामी समर्थ’ आणि ‘आई तुळजाभवानी’ या मालिकांचे महाशिवरात्री विशेष भाग प्रेक्षकांना पहायला मिळणार आहेत. प्रत्येक माणसात देव असतो त्याला नाकारू नका, हा माणुसकीची शिकवण देणारा संदेश यंदाच्या ‘जय जय स्वामी समर्थ’ मालिकेतील महाशिवरात्री विशेष सप्ताहाचा महत्वाचा पैलू आहे. देवी पार्वती अक्कलकोटमध्ये एक सामान्य स्त्री म्हणून राहू लागते. रोजचं जीवन जगण्यासाठी मदत मागू लागते. तिला गावकऱ्यांनी मदत करावी म्हणून स्वामी त्यांना भेटून प्रेरित करत आहेत, पण महाशिवरात्रीच्या उत्सवात महादेवाकडून खूप काही मिळवण्याच्या धुंदीत असलेला प्रत्येक गावकरी फक्त उत्सव साजरा करण्यात मग्न आहे. त्या गरीब सामान्य स्त्रीला कोणीही मदत करत नाही.
माणसातली माणुसकी हरवलेली पाहून देवी पार्वती व्यथित होते आणि महाशिवरात्रीच्या दिवशी ती सामान्य गरीब स्त्री, देवी पार्वतीमध्ये रूपांतरित होते. तिचा क्रोध अनावर होतो. तिचा राग शांत करण्यासाठी स्वामी महादेव रुपात प्रकटतात. आता वेळ आहे परिणामांची आणि आपण दोघांनी मिळून शिकवण देण्याची असे शिवपार्वती ठरवतात. इथे मंदिरातले शिवलिंग गायब होते. शिवलिंग परत मिळवण्याची माणुसकीचा मंत्र शिकवणारी दिव्य स्वामी लीला महाशिवरात्री भागात घडणार असून ती प्रत्येकाने आवर्जून अनुभवण्यासारखी आहे.
‘आई तुळजाभवानी’ या मालिकेत महादेव आणि संपूर्ण कुटुंबाने सत्य लपवल्याने व्यथित झालेल्या देवीच्या रागात महिषासुराने केलेल्या आगळीकीने भर पडली आणि आई तुळजाभवानीचे आजवर कधीही न पाहिलेले न भूतो न भविष्यति महाकाली रूप प्रेक्षकांना पाहायला मिळालं. आता आई तुळजाभवानीचे महाकाली रुपाचे प्रयोजन काय? याचा खुलासा हळूहळू मालिकेत होईलच. पण, महाशिवरात्रीचं औचित्य साधून मराठी टेलिव्हिजनवर पहिल्यांदाच भगवान शंकरांचं पंचानन महादेव रूप भक्तांना पहायला मिळणार आहे. आई तुळजाभवानी अवतारात असलेल्या देवी पार्वतीला महादेवांच्या भवानीशंकर रूपाची ओळख पटते. बालगणेश, अशोकसुंदरी हे कुटुंब एकत्र येतं. देवी पार्वती महाशिवरात्रीच्या निमित्ताने महादेवांची मनोभावे पूजा करते. देवी पार्वती म्हणते आई तुळजाभवानी अवतारात मी माझे वचन पूर्ण केलं आहे, आता महादेव तुम्ही तुमचे वचन पूर्ण करा. महादेवांनी देवींना कोणते वचन दिले, ते ‘पंचानन महादेव रूपात’ का प्रकट झाले, त्याचे प्रयोजन काय याची उत्तरे महाशिवरात्री विशेष भागात मिळणार आहेत.
