Tunisha Sharma Case: तुरुंगात असलेल्या शिझान खानच्या ‘या’ मागण्या न्यायालयाकडून होणार पूर्ण

Tunisha Sharma Case: टीव्ही अभिनेत्री तुनिशा शर्मा अत्महत्या प्रकरणी अभिनेता आणि एक्स बॉयफ्रेंड शिझान खानला १४ दिवसांची न्यायालयीन कोठडी सुनावण्यात आली आहे. दरम्यान काही दिवसांपूर्वी शिझानच्या वकिलांनी न्यायालयाकडे अभिनेत्याचे केस न कापण्याची विनंती केली होती. याशिवाय, शिझानला तुरुंगात सुरक्षा आणि वैद्यकीय समुपदेशनाची मागणी करण्यात आली होती. मंगळवारी न्यायालयाने शिझान खान याने केलेल्या मागण्या पूर्ण केल्या आहेत.

न्यायालयाच्या निर्णयानंतर शिझानचे केस कापले जाणार नाहीत. आता तुनिशा हत्या प्रकरणात शिझानच्य जामिनावर सुनावणी ७ जानेवारीला होणार आहे. म्हणून तुनिषा आत्महत्या प्रकरणात वादाच्या भोवऱ्यात अडकलेल्या शिझानला दिलासा मिळेल का? हे ७ जानेवारीलाच कळेल.

टीव्ही अभिनेत्री तुनिशा शर्माने २४ डिसेंबर २०२२ रोजी आत्महत्या केली. अभिनेत्रीने बॉयफ्रेंडच्या मेकअप रुममध्ये गळफास लावत आत्महत्या केल्यामुळे अनेक तर्क-वितर्क लढवले जात आहेत. तुनिशा आत्महत्ये प्रकरणी अभिनेता आणि एक्स बॉयफ्रेंड शिझान खानला अटक करण्यात आली आहे.

तुनिशाच्या आईने अभिनेत्याने गंभीर आरोप केले आहेत. ज्यामुळे अभिनेत्याच्या अडचणीत वाढ होत आहे. तुनिशाच्या आईने शिझानवर आरोप केल्यानंतर शिझानच्या वकिलांनी देखील अभिनेत्रीच्या आईवर गंभीर आरोप केले आहेत.

शिझानच्या वकिलांनी तुनिशाच्या आईवर केले गंभीर आरोप पत्रकार परिषदेत शिझानचे वकील म्हणाले, ‘तुनिशाच्या आईने तिचा गळा दाबला होता. तुनिशा ज्या मालिकेमध्ये काम करत होती, त्या मालिकेच्या दिग्दर्शकांना देखील अभिनेत्रीने हा प्रकार सांगितला होता.’ एवढंच नाही, तर तुनिशाला तिने मेहनतीने कमावलेले पैसे देखील आईकडून सतत मागावे लागत होते… असं देखील शिझानचे वकील पत्रकार परिषदेत म्हणाले.