Kantara: ‘कांतारा’चा आणखी एक विक्रम; 41 दिवसांत केली कमाल

Kantara

Image Credit source: Twitter

कर्नाटक- ऋषभ शेट्टीचा ‘कांतारा’ हा चित्रपट बॉक्स ऑफिसवर अद्याप कमाल करताना दिसतोय. या चित्रपटाला प्रदर्शित होऊन जवळपास महिना उलटला तरी थिएटरमध्ये येणाऱ्या प्रेक्षकांची संख्या कमी झाली नाही. एकीकडे या चित्रपटाने 276.56 कोटी रुपयांपेक्षा गल्ला जमवला. तर दुसरीकडे ‘कांतारा’ने तिकिट विक्रीच्या बाबतीत नवा विक्रम केला आहे. मूळ कन्नड भाषेत असलेल्या या चित्रपटाने कर्नाटकमध्ये 1 कोटी तिकिटं विकल्याचा विक्रम केला आहे.

फक्त 16 कोटींच्या बजेटमध्ये बनलेल्या या चित्रपटाच्या कन्नड व्हर्जनने 41 दिवसांत 151.80 कोटी रुपयांची कमाई केली. कांताराच्या जगभरातील कमाईचा आकडा आता 353 कोटी रुपयांवर पोहोचला आहे.

ऋषभ शेट्टीनेच कांताराचं दिग्दर्शन केलं आणि चित्रपटात मुख्य भूमिकाही साकारली. 30 सप्टेंबर रोजी हा चित्रपट कन्नड भाषेत प्रदर्शित झाला. चित्रपटाला मिळत असलेला प्रतिसाद पाहता नंतर तो इतर भाषांमध्ये डब करण्यात आला. 14 ऑक्टोबर रोजी कांतारा हिंदी, तमिळ, तेलुगू आणि मल्याळम भाषेत प्रदर्शित झाला.

कांताराने प्रदर्शनाच्या 41 व्या दिवशी कन्नड व्हर्जनद्वारे जवळपास 30 लाख रुपयांची कमाई केली. तर देशभरातील कमाईचा आकडा 2.30 कोटींवर पोहोचला. कांताराच्या हिंदी व्हर्जनची कमाई ही अजूनही चांगली आहे. मंगळवारी हिंदी व्हर्जनमधील कमाई 2.6 कोटी रुपये इतकी झाली.

केजीएफ-चाप्टर 1 आणि चाप्टर 2 या दोन्ही चित्रपटांना ‘कांतारा’ने चांगली टक्कर दिली आहे. हिंदी आणि तेलुगू व्हर्जनलाही चांगला प्रतिसाद मिळतोय.

“कांतारा हा चित्रपट पॅन-इंडिया बनावा, या उद्देशाने मी काम केलं नव्हतं. कथा जितकी चांगली मांडता येईल, तितकं चांगलं यावर माझा भर होता. कथा चांगली होती म्हणून कांताराने स्वत: पुढची वाट शोधली. हे कसं झालं हे आम्हालाही कळलं नाही”, अशी प्रतिक्रिया ऋषभने दिली.