साऊथच्या ‘मोस्ट एलिजिबल बॅचलर’चा साखरपुडा; RRR फेम रामचरणनेही लावली हजेरी
या खास कार्यक्रमाला RRR फेम अभिनेता रामचरणने पत्नी उपासनासह हजेरी लावली. खुद्द शारवानंदनेही त्याच्या इन्स्टाग्राम अकाऊंटवर साखरपुड्याचे फोटो पोस्ट केले आहेत. तुम्हा सर्वांच्या आशीर्वादाची खूप गरज आहे, असं लिहित त्याने रक्षितासोबतचे फोटो पोस्ट केले आहेत.
हैदराबाद: दाक्षिणात्य चित्रपटसृष्टीतील लोकप्रिय अभिनेता शारवानंदने त्याच्या आयुष्यातील नव्या प्रवासाला सुरुवात केली आहे. कुटुंबीय आणि साऊथ फिल्म इंडस्ट्रीतील काही सेलिब्रिटींच्या उपस्थितीत शारवानंदने रक्षिताशी साखरपुडा केला आहे. या साखरपुड्याचे फोटो सोशल मीडियावर व्हायरल होत आहेत. या खास कार्यक्रमाला RRR फेम अभिनेता रामचरणने पत्नी उपासनासह हजेरी लावली. खुद्द शारवानंदनेही त्याच्या इन्स्टाग्राम अकाऊंटवर साखरपुड्याचे फोटो पोस्ट केले आहेत. तुम्हा सर्वांच्या आशीर्वादाची खूप गरज आहे, असं लिहित त्याने रक्षितासोबतचे फोटो पोस्ट केले आहेत.
साखरपुड्याला शारवानंदने गुलाबी रंगाचा कुर्ता आणि पायजमा परिधान केला आहे. तर रक्षितानेही त्याच रंगसंगतीची डिझायनर साडी नेसली आहे. रक्षिता ही आंध्रप्रदेशातील एका राजकीय कुटुंबाशी संबंधित आहे. तिचे वडील पसुनूर मधुसूदर रेड्डी हे हायकोर्टातील वकील आहेत. तर रक्षिता ही अमेरिकेत टेक्निकल स्पेशलिस्ट म्हणून काम करते.
मेगास्टार चिरंजीव यांच्यासोबत ‘थम्स अप’ या ब्रँडची जाहिरात केल्यामुळे शारवानंद प्रकाशझोतात आला होता. आपल्या करिअरमध्ये त्याने चिरंजीवी, व्यंकटेश यांसारख्या दिग्गज तेलुगू अभिनेत्यांसोबत काम केलं आहे.
शारवानंदने 2004 मध्ये ‘एधो तारीखू’ या चित्रपटातून तेलुगू चित्रपटसृष्टीत पदार्पण केलं. रामचरण आणि राणा डग्गुबत्ती हे त्याचे क्लासमेट्स होते. गेल्या वर्षी त्याचे ‘आडवाल्लू मीकू जोहरालू’ आणि ‘ओके ओका जिवीतम’ हे चित्रपट प्रदर्शित झाले होते.
शारवानंद आणि रक्षिताच्या साखरपुड्याला मेगास्टार चिरंजीवी आणि नागार्जुन यांचं कुटुंब, राणा डग्गुबत्ती, सिद्धार्थ, अदिती राव हैदरी, नितीन, श्रीकांत हे दाक्षिणात्य सेलिब्रिटी उपस्थित होते.
