Zayn Marie Khan : आमिर खानच्या भाचीला मुंबई पोलिसांकडून मारहाण, शरीरावरचे व्रण दाखवत म्हणाली…
Zayn Marie Khan : आमिर खानची भाची झेन मेरी खानला मुंबई पोलिसांनी मारहाण केली असून अभिनेत्रीनं सोशल मीडियावर पोस्ट शेअर करत शरीरावरचे व्रण दाखवले आहेत.
बॉलिवूड अभिनेता इम्रान खान, त्याची गर्लफ्रेंड लेखा वॉशिंग्टन आणि झेन मेरी खान यांना शनिवारी मुंबई पोलिसांनी ताब्यात घेतलं आणि काही तासांनंतर त्यांची सुटका करण्यात आली. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी 'कॉकरोच जनता पार्टी'नं आयोजित केलेल्या आंदोलनात हे तिघं सहभागी झाले होते. ताब्यात घेण्यापूर्वी ते ऑगस्ट क्रांती मैदानावर आंदोलनाला पाठिंबा देत होते. पोलीस कोठडीनंतर झेन मेरीनं इन्स्टाग्रामवर एक व्हिडिओ शेअर केला.
'डेमोक्रॅटिक फिट चेक' असं कॅप्शन देत अभिनेत्रीनं पोलीस कोठडीत झालेल्या जखमा आणि व्रण उघडपणे दाखवले. व्हिडिओमध्ये तिच्या हातांवर, पायांवर निळे आणि पिवळे डाग आणि जखमा स्पष्टपणे दिसत आहेत.
झेन मेरीने फक्त जखमाच दाखवल्या नाहीत, तर प्रशासन आणि पोलिसांच्या कारवाईवरही टीका केली. व्हिडिओच्या शेवटी अभिनेत्री म्हणाली, 'तुम्ही मला आणखी किती घाबरवण्याचा प्रयत्न करणार? ही भीती अखेरीस नाहीशी होईल.'
झेन मारी खान ही एक अभिनेत्री आणि दिग्दर्शक मन्सूर खान यांची मुलगी आहे. मन्सूर खान हे सुपरस्टार आमिर खानचे चुलत भाऊ आहेत. त्यांनी आमिर खानच्या 'कयामत से कयामत तक', 'जो जीता वोही सिकंदर' आणि 'अकेले हम अकेले तुम' यांसारख्या सुपरहिट चित्रपटांचं दिग्दर्शन केलं आहे.
झेननं २०२० मध्ये 'मिसेस सीरियल किलर' या नेटफ्लिक्स चित्रपटातून पदार्पण केलं. ती 'फील्स लाइक इश्क' या नेटफ्लिक्स वेब सीरिजमध्येही दिसली आहे. झेननं आलिया भट्टच्या 'कपूर अँड सन्स' या चित्रपटातही एक छोटी भूमिका साकारली होती.
