Shah Rukh Khan | ‘सेक्स आणि शाहरुख’, 20 वर्षांपूर्वी नेहा धुपियाने केलं होतं विधान, म्हणाली “आजही तेच खरं ठरतंय”

मुंबई: ‘पठाण’च्या दमदार कमाईसह अभिनेता शाहरुख खानने बॉलिवूडचा ‘किंग’ आपणच असल्याचं पुन्हा एकदा सिद्ध केलं आहे. या चित्रपटाला फक्त भारतातच नाही तर देशभरात तुफान प्रतिसाद मिळतोय. अवघ्या चार दिवसांत ‘पठाण’ने 400 कोटी रुपयांची कमाई केली आहे. पठाणच्या या यशादरम्यान अभिनेत्री नेहा धुपियाचं जुनं वक्तव्य पुन्हा एकदा चर्चेत आलं आहे. 2004 मध्ये दिलेल्या एका मुलाखतीत नेहाने शाहरुखविषयी हे वक्तव्य केलं होतं. आता 20 वर्षांनंतर तिने पुन्हा एकदा त्या वक्तव्याचा उल्लेख करत शाहरुखचं कौतुक केलं आहे.

2004 मध्ये दिलेल्या मुलाखतीत नेहा म्हणाली होती, “एकतर सेक्स विकलं जातं किंवा मग शाहरुख खान”. आता या वक्तव्यावरून ट्विट करत नेहाने पुन्हा लिहिलं, ’20 वर्षांनंतरही माझं हे वक्तव्य खरं ठरतंय. हे एखाद्या अभिनेत्याचं करिअर नाही तर किंगची सत्ता आहे.’

2004 मध्ये नेहा धुपियाचा ‘जुली’ हा चित्रपट प्रदर्शित झाला होता. या चित्रपटात तिने इंटिमेट सीन्स केले होते. यामध्ये नेहाने देहविक्रेय महिलेची भूमिका साकारली होती. याच भूमिकेवरून तिला त्या मुलाखतीत प्रश्न विचारण्यात आला होता. त्यावर ती म्हणाली होती, “जुली या चित्रपटात बरेच इंटिमेट सीन्स आहेत, ज्यामध्ये माझ्या शरीराला दाखवलं गेलं आहे. मला सेक्स सिम्बॉलच्या टॅगने काही फरक पडत नाही. जुलीमध्ये अशी भूमिका साकारून मी मल्लिका शेरावत आणि बिपाशा बासू यांना मागे टाकलं, असं लोक म्हणाले तरी मला फरक पडत नाही. आजच्या घडीला एकतर सेक्स विकलं जातं किंवा मग शाहरुख खान.”

नेहा धुपियाचं ट्विट-

20 years on, my statement rings true. This is not an “actor’s career” but a “King’s reign”! #KingKhan @iamsrk ? https://t.co/TMgPzpJed4

— Neha Dhupia (@NehaDhupia) January 28, 2023

नेहा धुपियाने असं वक्तव्य का केलं, याबद्दल तिने नंतर दिलेल्या एका मुलाखतीत स्पष्ट केलं होतं. “आजच्या घडीला अनेक गोष्टी वेळेनुसार बदलत आहेत. मात्र एक गोष्ट आजही जशीच्या तशी आहे, ती म्हणजे एकतर सेक्स विकलं जातं किंवा मग शाहरुख खान.”

शाहरुख खानचा पठाण हा चित्रपट 25 जानेवारी रोजी प्रदर्शित झाला. यामध्ये त्याच्यासोबत दीपिका पदुकोण, जॉन अब्राहम, डिंपल कपाडिया आणि आशुतोष राणा यांच्याही भूमिका आहेत.