तब्बल 3200 कोटींची कमाई, बॉक्स ऑफिसवर धुमाकूळ घातल्यानंतर आता ओटीटीवर; कधी अन् कुठे पाहू शकता?

अत्यंत कमी बजेटमध्ये बनलेल्या एका सायकोलॉजिकल हॉरर थ्रिलर चित्रपटाची सध्या जगभरात जोरदार चर्चा आहे. विशेष म्हणजे एका 26 वर्षांच्या युट्यूबरने हा चित्रपट बनवला आहे. या चित्रपटाचं नाव आहे ‘ऑब्सेशन’. या चित्रपटाला आयएमडीबीवर (IMDb) दहा पैकी 8.2 अशी दमदार रेटिंग मिळाली आहे. करी बार्कर दिग्दर्शित या चित्रपटाने बॉक्स ऑफिसवर अनेक विक्रम मोडले आहेत. आता प्रेक्षक या हॉरर चित्रपटाच्या ओटीटी रिलीजची प्रतीक्षा करत आहेत. भारतात या चित्रपटातील महत्त्वाच्या सीन्सवर सेन्सॉर बोर्डाने कात्री चालवल्याने काही प्रेक्षकांची निराशा झाली होती. आता ओटीटीवर त्यांना अनकट व्हर्जन पाहता येणार आहे.

‘मूव्ही वेब’ने दिलेल्या वृत्तानुसार, ‘ऑब्सेशन’ हा चित्रपट येत्या 30 जून रोजी डिजिटलवर रेंटवर उपलब्ध होणार आहे. त्यासाठी प्रेक्षकांना ठराविक शुल्क भरावं लागणार आहे. मात्र 30 जून रोजी कोणत्या वेळी हा चित्रपट स्ट्रीम होईल, याची अद्याप माहिती समोर आली नाही. तुम्ही हा चित्रपट ‘पीकॉक’ (Peacock) या ओटीटी प्लॅटफॉर्मवर पाहू शकता. ओटीटी प्लॅटफॉर्मच्या सबस्क्रिप्शनसह हा चित्रपट अद्याप स्ट्रीम होणार नाही. त्यामुळे चाहत्यांना फक्त ठराविक शुल्क भरूनच तो ऑनलाइन पाहता येणार आहे. या चित्रपटाची सबस्क्रिप्शन रिलिज डेट अद्याप समोर आली नाही.

‘सॅकनिल्क’ने दिलेल्या वृत्तानुसार, या चित्रपटाने जगभरात तब्बल 3200 कोटी रुपयांचा गल्ला जमवला आहे. तर भारतात या चित्रपटाच्या कमाईचा आकडा 93.60 कोटी रुपये इतका आहे. या चित्रपटाने भारतात पहिल्याच दिवशी 1.75 कोटी रुपये आणि पहिल्या आठवड्यात 18.55 कोटी रुपयांची कमाई केली होती. दुसऱ्या आठवड्यातील कमाईचा आकडा थेट 31.25 कोटी रुपयांवर पोहोचला होता. 15 मे रोजी हा चित्रपट प्रदर्शित झाला होता.

मायकल जॉनस्टन आणि इंटे नवरेट यांचा हा हॉरर थ्रिलर चित्रपट आधी 2 जून रोजी ओटीटीवर स्ट्रीम होणार होता. मात्र चित्रपटाला थिएटरमध्ये मिळणारा प्रतिसाद पाहून निर्मात्यांनी ओटीटी रिलीज पुढे ढकलली. ‘पिकॉक’ या प्लॅटफॉर्मनंतर हा चित्रपट नेटफ्लिक्सवर प्रदर्शित केला जाईल, असंही कळतंय.