मीरा जगन्नाथ आणि जय दुधाणे यांचं ‘जोडी दोघांची दिसते चिकनी’ गाणं रिलीज, बिग बॉसनंतर पहिल्यांदाच दोघे एकत्र
जय दुधाणे आणि मीरा जगन्नाथ यांचा 'जोडी दोघांची दिसते चिकनी' हा म्युझिक व्हीडिओ रिलीज झाला आहे. जय दुधाणे आणि मीरा जगन्नाथ यांचं हे गाणं चाहत्यांच्या पसंतीला उतरतंय.
मुंबई : बिग बॉस मराठी (Big Boss Marathi) या रिअॅलिटी शोचा उपविजेता जय दुधाणे (Jay Dudhane) आणि याच शोधमील स्पर्धक असलेली अभिनेत्री मीरा जगन्नाथ (Meera Jagnnath) पहिल्यांदाच म्युझिक व्हिडिओमध्ये एकत्र आले आहेत. ‘जोडी दोघांची दिसते चिकनी’ (Jodi Doghanchi Disate Chikani) हा म्युझिक व्हीडिओ रिलीज झाला आहे. सप्तसूर म्युझिक या युट्यूब चॅनलवर हा म्युझिक व्हीडिओ रिलीज झालाय. ‘जोडी दोघांची दिसते चिकनी, कोलीवाऱ्याची राजा नी राणी’ असे शब्द असलेलं हे गाणं अतिशय श्रवणीय आहे. सहजपणे ओठी रुळणारे आणि उडती चाल ही गाण्याची वैशिष्ट्यं आहेत. जय दुधाणे आणि मीरा जगन्नाथ यांचं हे गाणं चाहत्यांच्या पसंतीला उतरतंय.
साईनाथ राजाध्यक्ष यांनी ‘जोडी दोघांची दिसते चिकनी’ या म्युझिक व्हिडिओची निर्मिती केली आहे. बीना राजाध्यक्ष या सहनिर्मात्या आहेत. केवल वाळंज आणि सोनाली सोनावणे या नव्या दमाच्या गायकांनी हे गाणं गायलं आहे. राजेंद्र वैद्य कल्याणकर यांच्या शब्दांना अमेय मुळे यांनी स्वरसाज चढवला आहे.
एमटीव्हीवरच्या ‘स्प्लिट्सव्हिला’ या रिअॅलिटी शोच्या तेराव्या सीझनमधून जय दुधाणे प्रकाशझोतात आला. त्यानंतर जयनं बिगबॉसच्या अंतिम फेरीत मजल मारून उपविजेतेपद मिळवलं. तर मीरानं माझ्या नवऱ्याची बायको’ आणि येऊ कशी तशी मी नांदायला’ या मालिकातून आपला अभिनय प्रवास सुरू केला. बिग बॉसमध्ये मीरा आणि जय दोघे एकत्र होते. बिग बॉसचा सीझन संपल्यानंतर मीरा आणि जय पहिल्यांदाच म्युझिक व्हिडिओतून एकत्र झळकले आहेत. साईनाथ राजाध्यक्षनिर्मित ‘तुझी माझी यारी’ या प्लॅनेट मराठी ओटीटी प्लॅटफॉर्म वर रिलीज झालेल्या वेबसिरीजमध्ये मीरा जगन्नाथने मुख्य भूमिका केली आहे.
मीरा जगन्नाथ आणि जय दुधाणे यांचं ‘जोडी दोघांची दिसते चिकनी’ नुकतंच प्रदर्शित झालंय. त्यांच्या या गाण्याला दोन दिवसात साडे सहाशेहून अधिक लोकांनी पाहिलं आहे.
संबंधित बातम्या