Pathaan | शाहरुख बनला बॉक्स ऑफिसचा ‘बादशाह’; ‘पठाण’ने पहिल्याच दिवशी केली 100 कोटींची कमाई
शाहरुख खान, दीपिका पदुकोण आणि जॉन अब्राहम यांच्या मुख्य भूमिका असलेला 'पठाण' हा चित्रपट 25 जानेवारी रोजी प्रदर्शित झाला. पदार्पणाच्या दिवशीच या चित्रपटाने भारतात 54 कोटी रुपयांचा गल्ला जमवला. तर परदेशातही त्याची प्रचंड क्रेझ पहायला मिळाली.
मुंबई: तब्बल चार वर्षांनंतर अभिनेता शाहरुख खानने मुख्य भूमिकेतून मोठ्या पडद्यावर कमबॅक केलं आणि त्याच्या कमबॅकच्या या चित्रपटाने पहिल्याच दिवशी दणक्यात कमाई केली. शाहरुख खान, दीपिका पदुकोण आणि जॉन अब्राहम यांच्या मुख्य भूमिका असलेला ‘पठाण’ हा चित्रपट 25 जानेवारी रोजी प्रदर्शित झाला. पदार्पणाच्या दिवशीच या चित्रपटाने भारतात 54 कोटी रुपयांचा गल्ला जमवला. तर परदेशातही त्याची प्रचंड क्रेझ पहायला मिळाली. पठाणने परदेशातही तेवढीच कमाई केल्याचं कळतंय. त्यामुळे जगभरातल्या कमाईचा आकडा पाहिला तर पहिल्याच दिवशी शाहरुखच्या ‘पठाण’ने 100 कोटींचा टप्पा पार केला आहे.
पठाणने पहिल्याच दिवशी जगभरात 100 ते 110 कोटी रुपयांचा गल्ला जमवला आहे. उत्तर अमेरिकेत या चित्रपटाने 1.5 दशलक्ष डॉलर्सची कमाई केली आहे. पठाणने हृतिक रोशनच्या ‘वॉर’, यशच्या ‘केजीएफ 2’ (हिंदी व्हर्जन) या चित्रपटांचा विक्रम मोडला आहे. वॉरने पहिल्या दिवशी 50 तर केजीएफ 2 ने 52 कोटी रुपयांची कमाई केली होती.
सिद्धार्थ आनंद दिग्दर्शित हा चित्रपट हिंदीसोबत तमिळ आणि तेलुगू भाषेत प्रदर्शित झाला आहे. प्रजासत्ताक दिनाची सुट्टी लक्षात घेता ‘पठाण’च्या दुसऱ्या दिवसाच्या कमाईतही चांगली वाढ पहायला मिळेल असा अंदाज व्यक्त होत आहे.
‘पठाण’मुळे शाहरुखचं 32 वर्षांपासूनचं स्वप्न पूर्ण
“मी 32 वर्षांपूर्वी फिल्म इंडस्ट्रीत एक ॲक्शन हिरो बनण्यासाठी आलो होतो. मात्र ते मी बनू शकलो नाही. कारण त्यांनी मला एक रोमँटिक हिरो बनवून टाकलं. मला फक्त ॲक्शन हिरो बनायचं होतं. मी डीडीएलजेवरही (दिलवाले दुल्हनियाँ ले जाएंगे) प्रेम करतो. मला राहुल, राज आणि ती सर्व चांगली मुलं आवडतात. पण मला नेहमीच असं वाटायचं की मी एक ॲक्शन हिरो आहे. त्यामुळे माझ्यासाठी हे माझं स्वप्न पूर्ण होण्यासारखं आहे”, असं शाहरुखने म्हटलंय.
‘पठाण’साठी दीपिका पदुकोणची निवड का?
“या चित्रपटाला दीपिकाच्या तोडीच्या एका व्यक्तीची गरज होती. जी बेशर्म रंगसारखं गाणंही करू शकेल, जी ॲक्शन सीन्स पण करू शकेल. यातील एका दृश्यात ती एका मुलाशी भिडते. ती इतकी धाडसी आहे की ते हे सर्व करू शकते. असं अनोखं समीकरण फक्त दीपिकासोबतच मिळू शकतं. एका ॲक्शन फिल्मच्या हिरोइनच्या दृष्टीने तिच्या भूमिकेला अनेक छटा आहेत”, असं किंग खानने सांगितलं.
