बिग बॉसच्या घरातील महेश भट्ट यांच्या ‘किस’चा किस्सा; ट्रोलिंगनंतर अखेर पूजा भट्टने सोडलं मौन

Pooja Bhatt

Image Credit source: Twitter

मुंबई | 17 ऑगस्ट 2023 : प्रसिद्ध दिग्दर्शक आणि निर्माते महेश भट्ट हे मुलगी पूजा भट्टला पाठिंबा देण्यासाठी काही दिवसांपूर्वी बिग बॉसच्या घरात पोहोचले होते. यावेळी त्याने इतर स्पर्धकांचीही भेट घेतली. मात्र जेव्हा ते मनीषा राणीजवळ पोहोचले, तेव्हा त्यांनी तिला मिठी मारली आणि किस केलं. हा व्हिडीओ जेव्हा समोर आला, तेव्हा महेश भट्ट यांच्या या वागणुकीमुळे मनीषा अनकम्फर्टेबल झाली असा आरोप नेटकऱ्यांनी केला. त्यावर आता बिग बॉसच्या घरातून बाहेर पडल्यानंतर पूजा भट्टने प्रतिक्रिया दिली आहे. “या घटनेवर मला किंवा माझ्या वडिलांना स्पष्टीकरण देण्याची काहीच गरज नाही”, असं म्हणाली.

“जेव्हा मनीषा दुसऱ्या स्पर्धकांना मिठी मारते आणि त्यांच्याकडे किसची मागणी करते, तेव्हा कोणाला काहीच प्रॉब्लेम नसतो. मला असं वाटतं की लोकांना या गोष्टीचा विसर पडला आहे की आपण जगाला तसंच पाहतो जसे आपण स्वत: असतो. जग जसं आहे तसं आपण त्याकडे पाहत नाही. जर लोक खरंच असा विचार करत असतील तर त्यांना मी फक्त गुड लक इतकंच म्हणू शकते”, अशा शब्दांत पूजा व्यक्त झाली.

याविषयी ती पुढे म्हणाली, “मला वाटत नाही की महेश भट्ट यांना किंवा मला त्यावर स्पष्टीकरण देण्याची गरज आहे. त्यांनी बिग बॉसच्या घरात अभिषेकलाही मिठी मारली होती आणि त्यालाही किस केलं होतं. जद हदिद हा खूप सुंदर आहे, अशीही स्तुती त्यांनी केली होती. मनीषाचे चाहते उगाच या घटनेला वाढवत आहेत.”

नेमकं काय घडलं होतं?

महेश भट्ट जेव्हा बिग बॉसच्या घरात जातात, तेव्हा ते मनीषा राणीला किस करतात आणि तिचा हात हातात घेतात. त्यांनी घरात प्रवेश करताच मनीषा त्यांचा आशीर्वाद घेण्यासाठी खाली झुकते. तेव्हा महेश भट्ट तिला रोखतात आणि स्वत: तिच्या पाया पडू लागलात. त्यानंतर दोघं बराच वेळ एकमेकांकडे पाहताना दिसले. बिग बॉसच्या घरात सतत बडबड करणारी मनीषा त्यांच्यासमोर गप्पच झाली होती. महेश भट्ट तिला म्हणाले की माझ्या डोळ्यांमध्ये बघ आणि दोघांच्या नजरेचा खेळ सुरू झाला. पूजा भट्ट आणि घरातील इतर स्पर्धक हे सर्व पाहत होते.