सरकार आवडत नसेल तर..; नसीरुद्दीन शाह यांच्यावर पुनीत इस्सार संतापले; थेट म्हणाले..

बॉलिवूडमधील ज्येष्ठ अभिनेते नसीरुद्दीन शाह आणि पुनीत इस्सार यांच्यातील वैचारिक मतभेद आता चर्चेचा विषय ठरले आहेत. आपल्या स्पष्टवक्तेपणासाठी ओळखले जाणारे नसीरुद्दीन शाह यांनी केंद्र सरकार आणि विद्यार्थ्यांच्या आंदोलनाबाबत केलेल्या वक्तव्यांवर अभिनेता पुनीत इस्सर यांनी नाराजी व्यक्त केली आहे. ‘महाभारत’ या लोकप्रिय मालिकेत दुर्योधनाची भूमिका साकारून घराघरांत पोहोचलेल्या पुनीत यांनी नसीरुद्दीन शाह यांच्या भूमिकेवर प्रश्न उपस्थित केले. ‘सरकार आवडत नसेल, तर निवडणूक लढवा आणि सरकारला हरवून दाखवा,’ अशा शब्दांत त्यांनी आपली भूमिका मांडली. त्यांच्या या वक्तव्यामुळे मनोरंजनविश्वात नव्या चर्चेला सुरुवात झाली आहे.

नसीरुद्दीन शाह यांच्याबद्दल बोलताना पुनीत इस्सार यांनी सर्वप्रथम त्यांच्याविषयी आदर व्यक्त केला. नसीरुद्दीन शाह हे आपल्यापेक्षा ज्येष्ठ कलाकार असून, त्यांच्याबद्दल आपल्याला आदर आहे. ते एक उत्तम कलाकार आहेत, असंही पुनीत यांनी म्हटलं. मात्र, त्यांच्या राजकीय भूमिकांशी आपण सहमत नसल्याचं पुनीत यांनी स्पष्ट केलं. त्यांच्या मते, सार्वजनिक जीवनात वावरणाऱ्या व्यक्तींनी देशातील विविध मुद्द्यांवर बोलताना निवडक भूमिका घेण्याऐवजी सर्व विषयांकडे व्यापक दृष्टिकोनातून पाहायला हवं. काही विशिष्ट विचारसरणीच्या मुद्द्यांवरच प्रतिक्रिया देणं योग्य आहे का, असा सवालही त्यांनी उपस्थित केला. भारत आणि जगासमोर अनेक प्रश्न आहेत. मात्र, त्यापैकी किती मुद्द्यांवर नसीरुद्दीन शाह स्पष्टपणे आपली भूमिका मांडतात, असा प्रश्न पुनीत यांनी विचारला.

पुनीत इस्सार यांनी आपल्या वक्तव्यादरम्यान जवाहरलाल नेहरू विद्यापीठ (जेएनयू), डाव्या विचारसरणीशी संबंधित भूमिका आणि तुरुंगात असलेल्या आरोपींच्या समर्थनाचा मुद्दाही उपस्थित केला. काही व्यक्ती देशातील विविध घटनांकडे एकाच विचारसरणीतून पाहतात, असा आरोप त्यांनी केला. दरम्यान, नसीरुद्दीन शाह यांनी अलीकडेच दिल्लीतील जामिया मिलिया इस्लामिया विद्यापीठातील विद्यार्थ्यांच्या आंदोलनाला पाठिंबा दिला होता. याआधी कोलकात्यातील सत्यजित रे फिल्म अँड टेलिव्हिजन इन्स्टिट्यूटमधील विद्यार्थ्यांच्या आंदोलनाबाबतही त्यांनी भूमिका मांडली होती. विद्यार्थ्यांवरील कारवाई आणि देशातील शैक्षणिक संस्थांच्या परिस्थितीवर त्यांनी प्रश्न उपस्थित केले होते. याच पार्श्वभूमीवर पुनीत इस्सार यांनी त्यांच्यावर टीका केली आहे.

नसीरुद्दीन शाह यांनी अलीकडेच सोशल मीडियावर शेअर केलेल्या व्हिडीओमध्ये स्वतःला ‘दिमागी नक्षल’ म्हणवून घेण्यास अभिमान वाटत असल्याचं सांगितलं होतं. विद्यार्थ्यांचा आवाज दाबण्याच्या प्रयत्नांवर त्यांनी टीका केली होती. त्यांच्या या विधानामुळे राजकीय आणि मनोरंजनविश्वात चर्चा सुरू झाली आहे.