हिरवा चुडा अन् मेहंदी..; त्या फोटोमुळे समृद्धी केळकरच्या लग्नाच्या चर्चांना उधाण

स्टार प्रवाह वाहिनीवरील ‘फुलाला सुगंध मातीचा’ या मालिकेतून घराघरात पोहोचलेली अभिनेत्री समृद्धी केळकर सध्या तिच्या एका फोटोमुळे सोशल मीडियावर चर्चेत आली आहे. समृद्धीच्या या फोटोवर मराठी टीव्ही इंडस्ट्रीतील कलाकारांसोबतच नेटकऱ्यांनीही कमेंट करत उत्सुकता व्यक्त केली आहे. ‘तारीख सेव्ह करून ठेवा’, ‘अखेर.. त्याची प्रतीक्षा करतोय’, ‘ओहो…’, ‘वाट पाहतोय’, ‘शुभेच्छा तुला’ असे असंख्य कमेंट्स समृद्धीच्या या फोटोवर येत आहेत. तिने पोस्ट केलेल्या या फोटोमध्ये समृद्धीच्या हातात हिरवा चुडा आणि मेहंदी पहायला मिळतेय. यासोबतच तिने कॅप्शनमध्ये ‘कळवते लवकरच’ असं म्हटलंय. या सर्व गोष्टींमुळे समृद्धी लवकरच लग्नाची बातमी सांगणार की काय, असा प्रश्न चाहत्यांना पडला आहे. काहींनी तिला आताच शुभेच्छा देण्यास सुरुवात केली आहे.

समृद्धीने गुपचूप लग्न उरकलं की काय, असाही प्रश्न नेटकऱ्यांना पडला आहे. तर काहींनी हा एखाद्या चित्रपटाच्या प्रमोशनसाठी लढवलेली युक्ती असावी, असाही अंदाज व्यक्त केला आहे. हातातील हिरवा चुडा आणि मेहंदीचा नेमका अर्थ काय, हे तर आता समृद्धीच स्पष्ट करू शकेल. मात्र त्यासाठी चाहत्यांना समृद्धीच्या पुढच्या पोस्टची प्रतीक्षा करावी लागणार आहे. नवीन वर्षात अनेक कलाकार चाहत्यांना आनंदाची बातमी देत आहेत. काहींनी लग्न केलंय, तर काहींनी नवीन घर घेतलंय. काही सेलिब्रिटींनी नवी गाडी विकत घेतली आहे. अशातच समृद्धीची आनंदाची बातमी काय असेल, याची नेटकऱ्यांमध्ये प्रचंड उत्सुकता आहे.

अभिनयासोबतच समृद्धी नृत्यातही पारंगत आहे. 2017 मध्ये तिने ‘ढोलकीच्या तालावर’ या डान्स शोमध्ये भाग घेतला होता. त्यात ती महाअंतिम फेरीपर्यंत पोहोचली होती. तिच्या नृत्याने प्रेक्षकांचं आणि परीक्षकांचं लक्ष वेधलं होतं. ‘ढोलकीच्या तालावर’ या शोनंतर 2018 मध्ये समृद्धीला कलर्स मराठी वाहिनीवरील ‘लक्ष्मी सदैव मंगलम’ या मालिकेत पहिली संधी मिळाली. तर 2020 मध्ये तिने ‘फुलाला सुगंध मातीचा’ या मालिकेत किर्ती जामखेडची मुख्य भूमिका साकारली. याशिवाय समृद्धीने ‘दोन कटींग’ या लघुपटातही काम केलंय. सोशल मीडियावर तिचा मोठा चाहतावर्ग असून इन्स्टाग्राम अकाऊंटवर समृद्धीचे पाच लाखांहून अधिक फॉलोअर्स आहेत.