एअरपोर्टवर शाहरुखला रोखलं? वृत्तामागील सत्य आलं समोर, बॉडीगार्डची झाली चौकशी

शाहरुख खान

मुंबई- अभिनेता शाहरुख खान आणि त्याच्या टीमला मुंबई विमानतळावर थांबवल्याचं वृत्त समोर आलं होतं. 18 लाख रुपयांच्या महागड्या घडाळ्यांसाठी शाहरुखला 6.83 लाख रुपये दंड ठोठावल्याचं म्हटलं जात होतं. मात्र यासंदर्भातील महत्त्वाची माहिती आता समोर आली आहे. “शाहरुख आणि त्याच्या टीमला ते घेऊन जात असलेल्या वस्तूंसाठी ड्युटी भरण्यास सांगण्यात आलं होतं. मात्र यासाठी कोणताही दंड किंवा अडवणूक करण्यात आली नव्हती. या प्रकरणाबद्दल सोशल मीडियावर जे म्हटलं जातंय, त्यात तथ्य नाही”, अशी माहिती एका वरिष्ठ कस्टम अधिकाऱ्याने ‘ई टाइम्स’शी बोलताना दिली.

शाहरुख खान, त्याची मॅनेजर पूजा ददलानी आणि त्यांची टीम कलिना इथल्या खासगी टर्मिनलवरून प्रवासासाठी निघाले होते. ज्याला जीए (जनरल एव्हिएशन) टर्मिनल असं म्हणतात. तर T2 या आंतरराष्ट्रीय टर्मिनलवरून दररोज शेकडो उड्डाणं होतात. जेव्हा कधी ड्युटी किंवा इतर कोणतंही शुल्क भरण्याचं प्रकरण असतं, तेव्हा GA टर्मिनलमधून प्रवाशांना T2 कडे नेलं जातं. कारण अशी परिस्थिती हाताळणारे कर्मचारी आणि सुविधा या T2 टर्मिनलवर असतात. GA टर्मिनलवरून दररोज प्रवास करणाऱ्या प्रवाशांची संख्या 10-12 असल्याने तिथे या सुविधांचा विस्तार केला गेला नाही, असं संबंधित अधिकाऱ्याने स्पष्ट केलं.

नेमकं काय घडलं?

घटलेल्या घटनेविषयी सांगताना ते पुढे म्हणाले, “शाहरुख आणि त्याची टीम GA टर्मिनलवर दुपारी 12.30 वाजता पोहोचली होती. त्यांच्याकडे सहा ते सात पिशव्या होत्या. त्यात महागडी घड्याळं ठेवण्याचे बॉक्स आणि एक ॲपल वॉच होतं. या वस्तूंच्या पावत्या त्यांच्याकडे नव्हत्या. त्या भेटवस्तू म्हणून मिळाल्याचं त्यांनी सांगितलं. त्या वस्तूंची किंमत इंटरनेटवर शोधली असता ती किंमत एकत्रितपणे 17.86 लाख रुपये इतकी झाली.”

शाहरुख खान महागडी घड्याळं घेऊन जात होता, असे पोस्ट सोशल मीडियावर व्हायरल झाले होते. मात्र ती घड्याळं नसून महागडी घड्याळं ठेवण्याचे बॉक्स होते, असं अधिकाऱ्याने सांगितलं. “शाहरुखच्या टीममधील बॉडीगार्ड रवी सिंगला बॅगसह घेऊन जाण्यात आलं. त्या बॅगेत कस्टम ड्युटी भरण्यासाठीचं सामान होतं. रवीने T2 टर्मिनलवर 6.88 लाख रुपये सीमा शुल्क भरले”, असंही त्यांनी स्पष्ट केलं.