जय-वीरू, बसंती, ठाकूर आणि गब्बर.. ‘शोले’साठी कोणाला किती मिळाली फी ?

चित्रपट असो किंवा जाहिरात , आजच्या काळात बॉलिवूडचे कलाकार हे प्रत्येक कामासाठी कोट्यवधी रुपयांची फी आकारतात. मात्र एककाळ असा होता, जेव्हा अभिनेते-अभिनेत्रींसाठी 1 लाख रुपयांचे मानधनही खूप होते. सहाय्यक भूमिकांमधील कलाकारांना तर 20-25 हजार रुपयेच मिळायचे. कल्ट चित्रपटाचे स्थान मिळवलेल्या शोलमधील सगळ्याच भूमिका अजरामर होत्या. 49 वर्षांपूर्वी प्रदर्शित झालेला शोले हा बॉलिवूडमधील सुपरहिट चित्रपटांपैकी एक आहे. आजही लोकांना हा चित्रपट खूप आवडतो. या चित्रपटात जय-वीरूची जोडी सर्वोत्कृष्ट होती, तर बसंतीची स्टाइलही सर्वात अनोखी होती. गब्बर या खलनायकाला तर सगळेच घाबरायचे. मात्र या चित्रपटासाठी कलाकारांना किती मानधन मिळालंय तुम्हाला माहीत आहे का. त्यांची फी ऐकाल तर तुम्हालाही आश्चर्य वाटल्याशिवाय राहणार नाही .

धर्मेंद्र यांना मिळालं सर्वाधिक मानधन

शोलेमध्ये धर्मेंद्र, मॅक मोहन, हेमा मालिनी, जया भादुरी, अमिताभ बच्चन, संजीव कुमार अमजद खान, असरानी यांच्यासह अनेक कलाकार महत्त्वपूर्ण भूमिका साकारताना दिसले होते. मीडिया रिपोर्ट्सनुसार, या चित्रपटासाठी धर्मेंद्र यांना 1 लाख 50 हजार रुपये, अमिताभ बच्चन यांना 1 लाख रुपये, हेमा मालिनी यांना 75 हजार रुपये, जया भादुरी यांना 35 हजार रुपये, संजीव कुमार यांना 1 लाख 25 हजार रुपये, मिळाले होते. स्टार्सची ही फीस ऐकून तुम्हालाही धक्का बसला असेल. एखाद्या सेलिब्रिटीने एवढी कमी फी आकारल्याचे तुम्ही पहिल्यांदाच ऐकलं असेल.

तोडले अनेक रेकॉर्ड्स

शोलेचे दिग्दर्शन रमेश सिप्पी यांनी केले होते. या चित्रपटाचे बजेट 3 कोटी होते. 15 ऑगस्ट 1975 रोजी शोले चित्रपटगृहात प्रदर्शित झाला. हा चित्रपट 25 आठवड्यांहून अधिक काळ थिएटरमध्ये चालला. 3 कोटींच्या बजेटमध्ये बनलेल्या या चित्रपटाने 35 कोटींची कमाई केली होती. जर हा चित्रपट आजच्या काळात बनला असता तर त्यातील स्टारकास्टच्या फीसाठी बजेटच्या निम्म्याहून अधिक पैसे लागले असते. या चित्रपटाची स्टारकास्टच इतकी मोठी आहे की त्यांच्या फीसह बजेट 100 कोटी रुपये झाले असते.