रियाने मेसेज केलेला, सुशांतची तब्येत खालावतेय..; स्मिता जयकर यांचा मोठा खुलासा, रुग्णालयातील ती भेट ठरली शेवटची

सुशांत सिंह राजपूत-रिया चक्रवर्ती, स्मिता जयकर

अभिनेता सुशांत सिंह राजपूतच्या निधनाला अनेक वर्षे उलटली असली, तरी त्याच्याशी संबंधित आठवणी आणि त्याच्या आयुष्यातील काही महत्त्वाच्या घटनांची चर्चा आजही होत असते. आता ज्येष्ठ अभिनेत्री स्मिता जयकर यांनी सुशांतविषयी एक भावनिक आठवण सांगितली आहे. सुशांत नैराश्यासाठी मुंबईतील हिंदुजा रुग्णालयात उपचार घेत असताना त्यांनी त्याला आध्यात्मिक उपचार देण्यासाठी भेट घेतली होती, असा खुलासा त्यांनी केला. विशेष म्हणजे, सुशांतची तत्कालीन मैत्रीण रिया चक्रवर्ती हिनेच त्यांच्याशी संपर्क साधून मदतीची विनंती केली होती. सुशांतच्या निधनानंतर त्याला आणखी मदत करता आली असती, अशी खंतही स्मिता यांनी व्यक्त केली.

रिया चक्रवर्तीने स्मिता जयकर यांना केला होता मेसेज

स्मिता जयकर यांनी अलीकडेच एका मुलाखतीत सुशांत सिंह राजपूतसोबतच्या भेटीचा अनुभव सांगितला. स्मिता आणि रिया चक्रवर्ती यांनी ‘सोनाली केबल’ या चित्रपटात एकत्र काम केलं होतं. त्यावेळी दोघींमध्ये आध्यात्मिक उपचारांविषयी चर्चा झाली होती. हीच गोष्ट रियाच्या लक्षात होती. त्यामुळे सुशांतची प्रकृती खालावत असल्याचं जाणवल्यानंतर तिने स्मिता यांच्याशी संपर्क साधला. रियाने सुशांतला मदत करण्यासाठी स्मिता यांना भेटण्याची विनंती केली. त्यानंतर स्मिता जयकर हिंदुजा रुग्णालयात सुशांतला भेटण्यासाठी गेल्या. त्या वेळी सुशांत नैराश्यासाठी उपचार घेत होता. स्मिता यांनी त्याच्याशी संवाद साधला आणि त्याला आध्यात्मिक उपचारांसाठी आपल्या आश्रमात येण्याबाबतही सांगितलं.

स्मिता जयकर यांनी सांगितलं की, रुग्णालयात भेट झाली तेव्हा सुशांत त्यांच्याशी अतिशय छान बोलला. तो त्यावेळी आनंदी असल्याचं त्यांना जाणवलं. सुशांतने त्यांच्या आश्रमात येऊन आध्यात्मिक उपचार घेण्याची तयारीही दर्शवली होती. मात्र, त्यानंतर ही भेट प्रत्यक्षात होऊ शकली नाही. स्मिता यांच्या म्हणण्यानुसार, त्या रात्री रिया चक्रवर्तीचा त्यांना पुन्हा मेसेज आला. त्यामध्ये रियाने सुशांतची तब्येत पुन्हा खालावत असल्याचं सांगितलं होतं. ‘स्मिता, त्याची अवस्था पुन्हा बिघडत आहे,’ अशा आशयाचा तो संदेश होता. सुशांतला आश्रमात आणून त्याला आणखी मदत करण्याची स्मिता यांची इच्छा होती. मात्र, त्यांची ही योजना पूर्ण होऊ शकली नाही.

सुशांतच्या निधनाची बातमी समजल्यानंतर स्मिता जयकर यांना मोठा धक्का बसला. त्यावेळी आपण त्याला आणखी मदत करू शकलो असतो का, असा प्रश्न त्यांच्या मनात निर्माण झाला. सुशांतने पुन्हा संपर्क साधला असता, तर त्याला आधार देण्याची संधी मिळाली असती, अशी खंत त्यांनी व्यक्त केली. सुशांत हा सकारात्मक स्वभावाचा अभिनेता होता आणि त्याच्या अभिनयाच्या त्या चाहत्या होत्या, असंही स्मिता यांनी सांगितलं. रुग्णालयात भेटीदरम्यान त्यांनी सुशांतला प्रेमाने मिठी मारली होती. त्या आठवणी आजही त्यांच्या मनात ताज्या आहेत.

या मुलाखतीत स्मिता जयकर यांनी रिया चक्रवर्तीबद्दलही आपलं मत मांडलं. सुशांतच्या कठीण काळात रिया त्याच्यासोबत होती आणि तिला त्याची मदत करायची होती, असं त्या म्हणाल्या. रियाला या प्रकरणात मोठ्या प्रमाणावर टीकेचा सामना करावा लागला, याबद्दलही त्यांनी सहानुभूती व्यक्त केली. रियासोबत काम करतानाचा अनुभव चांगला असल्याचं सांगत त्यांनी तिच्याविषयी सकारात्मक आठवणी शेअर केल्या.

सुशांत सिंह राजपूतचं 14 जून 2020 रोजी मुंबईतील वांद्रे इथल्या निवासस्थानी निधन झालं. ‘काय पो छे!’, ‘एम.एस. धोनी : द अनटोल्ड स्टोरी’ आणि ‘छिछोरे’ यांसारख्या चित्रपटांमधून त्याने प्रेक्षकांच्या मनात विशेष स्थान निर्माण केलं होतं. स्मिता जयकर यांच्या या आठवणींमुळे सुशांतच्या आयुष्यातील कठीण काळाची पुन्हा चर्चा सुरू झाली आहे.