Sunny Deol | इंडस्ट्रीतील घराणेशाहीवर पहिल्यांदाच व्यक्त झाला सनी देओल; म्हणाला “स्वत:च्या मुलासाठी..”
सनी देओलचा बहुचर्चित आणि बहुप्रतिक्षित 'गदर 2' हा चित्रपट येत्या 11 ऑगस्ट रोजी प्रदर्शित होणार आहे. या चित्रपटाच्या निमित्ताने सनी देओल आणि अमीषा पटेलची जोडी पुन्हा एकदा मोठ्या पडद्यावर एकत्र येणार आहे.
मुंबई | 7 ऑगस्ट 2023 : अभिनेता सनी देओल सध्या त्याच्या आगामी ‘गदर 2’ या चित्रपटाच्या प्रमोशनमध्ये व्यग्र आहे. यानिमित्त एका वृत्तवाहिनीला दिलेल्या मुलाखतीत तो बॉलिवूडमधील घराणेशाहीच्या मुद्द्यावर मोकळेपणे व्यक्त झाला. सनी देओलचे वडील धर्मेंद्र हे अभिनेते नसते तर काय केलं असतं, असा प्रश्न त्याला या मुलाखतीत विचारण्यात आला. त्यावर उत्तर देताना तो म्हणाला, “माहीत नाही, वडील जिथे असते, त्यांनी जे केलं असतं तेच मीसुद्धा केलं असतं. मी इंडस्ट्रीत अभिनेता बनलो नसतो तरी माझ्या वडिलांनी जे काही केलं त्याचंच मी पालन केलं असतं. किंबहुना वडिलांना आपल्या मुलासाठी काही करायचं असेल तर त्यात काहीच गैर नाही.”
बॉलिवूड इंडस्ट्रीतील घराणेशाहीच्या मुद्द्यावर प्रतिक्रिया देण्यास विचारलं असता तो पुढे म्हणाला, “मला असं वाटतं की हे सर्व असेच लोक पसरवतात, जे त्यांच्या आयुष्यात निराश आहेत. ते लोक ही गोष्ट समजत नाहीत की जर एक पिता त्याच्या मुलासाठी काही करत असेल तर त्यात गैर काहीच नाही. असं कोणतं कुटुंब आहे, जिथे वडील मुलाची मदत करत नाहीत? जे खरंच त्यांच्या मुलासाठी काही करू इच्छितात, त्यात चुकीचं काय आहे? मात्र यशस्वी तर तो स्वत:च्या कर्तृत्वाने बनू शकतो.”
“माझ्या वडिलांनी मला अभिनेता बनवलं नाही. मी माझ्या मुलाला अभिनेता बनवलं नाही. वडील इतके मोठे स्टार आहेत आणि मी माझी स्वत:ची ओळख स्वत: बनवली. माझ्या कर्तृत्त्वावर आज मी याठिकाणी आहे. मी माझ्या वडिलांसारखा नाही, पण आमच्यात बरंच काही साम्य आहे”, असंही तो पुढे म्हणाला.
सनी देओलचा बहुचर्चित आणि बहुप्रतिक्षित ‘गदर 2’ हा चित्रपट येत्या 11 ऑगस्ट रोजी प्रदर्शित होणार आहे. या चित्रपटाच्या निमित्ताने सनी देओल आणि अमीषा पटेलची जोडी पुन्हा एकदा मोठ्या पडद्यावर एकत्र येणार आहे. तब्बल 22 वर्षांनंतर ‘गदर : एक प्रेम कथा’ या चित्रपटाचा सीक्वेल प्रेक्षकांच्या भेटीला येत आहे. या चित्रपटाचंही दिग्दर्शन अनिल शर्मा यांनीच केलं आहे.
