Swara Bhasker | स्वरा भास्कर-फहाद अहमदच्या मुलीचं नाव ‘राबिया’; जाणून घ्या त्याचा अर्थ काय?
अभिनेत्री स्वरा भास्कर नुकतीच आई झाली असून सोशल मीडियावर तिने बाळासोबतचे फोटो पोस्ट केले आहेत. या फोटोंसोबतच तिने मुलीचं नावदेखील जाहीर केलं. स्वरा आणि फहाद अहमद यांनी त्यांच्या मुलीचं नाव 'राबिया' असं ठेवलं. या नावाचा अर्थ काय ते जाणून घेऊयात..
अभिनेत्री स्वरा भास्कर आणि फहाद अहमद यांच्या घरी चिमुकल्या पाहुणीचं आगमन झालं आहे. 23 सप्टेंबर रोजी स्वराने गोंडस मुलीला जन्म दिला. नुकतेच स्वराने बाळासोबतचे फोटो सोशल मीडियावर पोस्ट करत तिचं नावसुद्धा जाहीर केलं आहे.
सोमवारी फोटो पोस्ट करत स्वरा आणि फहाद यांनी त्यांच्या मुलीचं नाव जाहीर केलं. स्वरा आणि फहादने त्यांच्या मुलीचं नाव 'राबिया' असं ठेवलं आहे. सुफी संत राबिया बसरी यांच्या नावावरून त्यांनी मुलीचं नाव 'राबिया' असं ठेवलं आहे.
राबिया या नावाचा अर्थ वसंत ऋतू किंवा राणी असा होतो. स्वरा आणि फहादने या पोस्टमध्ये चाहत्यांचे आभार मानले. त्याचसोबत पालक म्हणून आयुष्याच्या या नव्या प्रवासासाठी फार उत्सुक असल्याचं दोघांनी म्हटलं आहे.
स्वरा भास्कर आणि फहाद अहमद यांनी यावर्षी जानेवारी महिन्यात लग्न केलं. 6 जानेवारी रोजी त्यांनी स्पेशल मॅरेज अॅक्टअंतर्गत विवाहनोंदणी केली. त्यानंतर दिल्लीत रिसेप्शनचं आयोजन करण्यात आलं.
6 जून रोजी स्वराने गरोदर असल्याचं जाहीर केलं होतं. लग्नाच्या सहा महिन्यांतच गरोदर झाल्याने स्वराला खूप ट्रोल करण्यात आलं होतं. इतकंच नव्हे तर प्रेग्नंसी फोटोशूटनंतरही स्वराला ट्रोलिंगचा सामना करावा लागला होता.
