Dipti Dhyani: अभिनेत्रीने पतीसाठी केलं मुंडण; ‘हे खरं प्रेम’ म्हणत नेटकऱ्यांनी केलं कौतुक

लग्न म्हणजे आयुष्यभरासाठी एकमेकांना दिलेलं वचन. आपल्या जोडीदारासाठी काहीही करायला तयार असणारे लोक खूप कमी पहायला मिळतात. अभिनेता सूरज थापरसाठी (Sooraj Thapar) त्याची पत्नी दिप्ती ध्यानीने (Dipti Dhyani) जे केलं, सध्या त्याचीच चर्चा सोशल मीडियावर होत आहे. दिप्तीचं हे उदाहरण पाहून खरं प्रेम आणि जीवनासाथी या शब्दांची प्रचिती येते. प्रत्येक महिलेसाठी आपले केस खूप मौल्यवान असतात. केसांच्या (Hair) चांगल्या वाढीसाठी महिला अनेक उपाय करत असतात. मात्र दिप्तीने आपल्या पतीसाठी चक्क मुंडण केलं आहे.

सूरज थापर यांना जेव्हा कोरोनाची लागण झाली होती, तेव्हा त्यांची प्रकृती गंभीर असल्याचं सांगण्यात येत होतं. सूरज लवकरात लवकर बरे व्हावेत यासाठी दिप्तीने प्रार्थना केली होती. सूरज यांची प्रकृती सुधारण्यासाठी त्यांनी तिरुपती बालाजीकडे जणू नवसच केला होता. त्यानुसार पतीची तब्येत ठीक झाल्यानंतर दिप्ती यांनी तिरुपती बालाजीला जाऊन मुंडण केलं. याचे फोटो त्यांनी सोशल मीडियावर शेअर केले. ‘तुझ्या नावे सूरज थापर’, असं कॅप्शन देत दिप्तीने हे फोटो पोस्ट केले आहेत.

पहा फोटो-

सूरज थापरनेही इंस्टाग्रामवर दिप्तीचे काही फोटो शेअर केले आहेत. यासोबतच त्यांनी ट्रान्सफॉर्मेशनचा व्हिडिओही शेअर केला आहे. हा व्हिडिओ शेअर करताना त्यांनी लिहिलं, ‘हे प्रेम आहे, या जगात तुमच्यासाठी असं कोणी करत नाही, हे खरं प्रेम आहे.’ दिप्तीचे हे फोटो पाहिल्यानंतर चाहत्यांनीही कमेंट करत कौतुकाचा वर्षाव केला आहे. ‘तुम्ही खूप महान आहात मॅडम’, असं एकाने लिहिलं. तर हे खरं प्रेम आहे, असं दुसऱ्या युजरने म्हटलंय. दिप्ती स्वतः देखील एक प्रसिद्ध टीव्ही अभिनेत्री आहे. चंद्रगुप्त मौर्य, माता की चौकी, कैरी रिश्ता खट्टा मीठा यांसारख्या टीव्ही शोमध्ये तिने काम केलं आहे.