जगातील सर्वात खतरनाक जेलमध्ये शूटिंग, 712 कोटी बजेट अन् कमाई 3184 कोटी रुपये, 30 वर्षांपूर्वीचा चित्रपट आजही चर्चेत
जगातील सर्वात खतरनाक जेलमध्ये झालेलं या चित्रपटाच शूटिंग. बॉक्स ऑफिसवर केलेली 3184 कोटी रुपयांची कमाई. 7 जून रोजी चित्रपटाला पूर्ण झाले 30 वर्षे.
हॉलिवूडमधील अॅक्शनपटांचा विचार केला तर 1996 साली प्रदर्शित झालेला The Rock हा चित्रपट आजही चाहत्यांच्या आवडीच्या यादीत अग्रस्थानी आहे. 7 जून 1996 रोजी प्रदर्शित झालेल्या या चित्रपटाला आता तब्बल 30 वर्षे पूर्ण झाली आहेत. दिग्दर्शक मायकेल बेंजामिन बे यांच्या कारकिर्दीतील हा सुरुवातीच्या काळातील महत्त्वाचा चित्रपट मानला जातो.
75 दशलक्ष डॉलरच्या बजेटमध्ये तयार झालेल्या या चित्रपटाने जागतिक बॉक्स ऑफिसवर 335 दशलक्ष डॉलरहून अधिक कमाई केली. आजच्या मूल्यांनुसार हा आकडा सुमारे 3,184 कोटी रुपयांच्या आसपास मानला जातो. त्यामुळे ‘द रॉक’ हा त्या काळातील सर्वाधिक यशस्वी अॅक्शनपटांपैकी एक ठरला.
दमदार कथा
‘द रॉक’ची कथा अमेरिकेतील प्रसिद्ध अल्काट्राझ आयलंड आणि तेथील तुरुंगाभोवती फिरते. चित्रपटात ब्रिगेडियर जनरल फ्रान्सिस हम्मेल आपल्या युद्धात मृत्यूमुखी पडलेल्या सैनिकांच्या कुटुंबांना न्याय मिळावा या मागणीसाठी अलकाट्राझ बेटावर ताबा मिळवतो. त्यानंतर तो अत्यंत घातक VX नर्व्ह गॅसचा वापर करून सॅन फ्रान्सिस्को शहरावर हल्ला करण्याची धमकी देतो.
ही भीषण परिस्थिती हाताळण्यासाठी एफबीआयचा रासायनिक तज्ज्ञ स्टॅन्ली गुडस्पीड आणि ब्रिटिश गुप्तहेर जॉन मेसन यांना मोहिमेवर पाठवले जाते. एका बाजूला कॉनरी यांचा शांत, अनुभवी आणि आत्मविश्वासपूर्ण स्वभाव, तर दुसऱ्या बाजूला केज यांचे तणावग्रस्त पण धाडसी व्यक्तिमत्त्व यामुळे पडद्यावर एक वेगळीच केमिस्ट्री पाहायला मिळाली.
अलकाट्राझ तुरुंगातच झाले चित्रीकरण
चित्रपटाचे मोठे आकर्षण म्हणजे त्याचे वास्तवदर्शी चित्रीकरण. ‘द रॉक’मधील अनेक सीन प्रत्यक्ष अलकाट्राझ तुरुंगात चित्रित करण्यात आले होते. त्या काळातही तेथे पर्यटकांची सतत वर्दळ असायची.
सध्या ‘द रॉक’ भारतातील कोणत्याही प्रमुख OTT प्लॅटफॉर्मवर नियमित सबस्क्रिप्शन किंवा मोफत स्ट्रीमिंगसाठी उपलब्ध नसल्याचे दिसते. त्यामुळे हा चित्रपट पाहू इच्छिणाऱ्या प्रेक्षकांना डिजिटल प्लॅटफॉर्मवर खरेदी पर्यायांचा वापर करून बघावा लागेल.
तीन दशकांनंतरही ‘द रॉक’ हा केवळ एक अॅक्शन चित्रपट नाही तर उत्कृष्ट पटकथा, दमदार अभिनय आणि वास्तवदर्शी अॅक्शन यांचा संगम म्हणून ओळखला जातो. त्यामुळेच आजही जगभरातील अॅक्शन चित्रपटप्रेमींसाठी तो एक क्लासिक चित्रपट मानला जातो.
