‘सैराट’ फेम अरबाजच्या व्हिडीओनंतर तुकाराम मुंढे रुग्णालयावर कारवाई करणार का? नेटकऱ्यांचा सवाल

‘सैराट’मध्ये सल्याची भूमिका साकारलेला अभिनेता अरबाज शेख याच्या एका व्हायरल व्हिडीओनंतर राज्यातील खाजगी रुग्णालयांच्या मुजोरीचा प्रश्न पुन्हा एकदा चर्चेत आला आहे. वडिलांना ब्रेन हॅमरेज झाल्यामुळे अरबाजने त्यांना उपचारासाठी सोलापुरातल्या नोबल रुग्णालयात दाखल केलं होतं. मात्र रुग्णालयाने त्यांच्याच मेडिकलमधून औषधे घेण्यास सांगितल्याने त्याचं बिल 40 हजार रुपयांचं झाल्याचं त्याने सांगितलं. खाजगी रुग्णालयाकडून अशा पद्धतीची लूट सुरू असल्याचा आरोप करत अरबाजने चाहत्यांकडे मदतीची विनंती केली होती. त्याचा हा व्हिडीओ सध्या सोशल मीडियावर तुफान व्हायरल होत असून त्यावर नेटकऱ्यांनी विविध प्रतिक्रिया दिल्या आहेत. तर दुसरीकडे याप्रकरणी अन्न व औषध प्रशासन (एफडीए) आयुक्त तुकाराम मुंढे काही कारवाई करतील का, असाही प्रश्न उपस्थित होत आहे.

तुकाराम मुंढेंनी दिलेला कारवाईचा इशारा

रुग्णालयात दाखल केलेल्या रुग्णांसाठी आत असलेल्या फार्मसीकडूनच औषधं आणि वैद्यकीय साहित्य खरेदी करण्याची सक्ती करणाऱ्या रुग्णालयांवर एफडीएचे आयुक्त तुकाराम मुंढे यांनी कारवाईचा इशारा दिला होता. रुग्णालयातील मेडिकलमधूनच औषधं किंवा वैद्यकीय साहित्य खरेदी करणं हे कायद्याने बंधनकारक नाही. औषधं कुठून खरेदी करायची, हा पूर्णपणे रुग्ण आणि त्याच्या नातेवाईकांचा अधिकार आहे, असं ते म्हणाले होते. तसंच याचं उल्लंघन करणाऱ्या रुग्णालयांवर कडक कायदेशीर कारवाई केली जाईल, असा इशाराही त्यांनी पत्रकार परिषदेत दिला होता. याबाबत कोणावरही रुग्णालय सक्ती करू शकत नाही, असं त्यांनी स्पष्ट म्हटलं होतं.

अरबाजचा व्हिडीओ-

रुग्णालयाचं स्पष्टीकरण

अरजाब शेखचा व्हिडीओ व्हायरल झाल्यानंतर त्यावर नोबल रुग्णालयाच्या प्रमुखांनी आपली बाजू मांडली आहे. “औषधं आमच्याकडूनच घेण्याबाबत आम्ही कधीही कोणालाही अनिवार्य करत नाही. मुळात दोन दिवसांपूर्वीच त्या रुग्णाने डिस्चार्ज घेतला आहे. मात्र तरीही त्यांनी असे आरोप का केले, याबाबत कल्पना नाही. तसंच रुग्णाच्या एकूण खर्चाबाबत आम्ही त्यांना आधीच कल्पना दिलेली होती”, अशी प्रतिक्रिया नोबल हॉस्पिटलचे प्रमुख डॉक्टर अमजद सय्यद यांनी दिली आहे.

रुग्णालयातील मेडिकलमधून औषधं घेतल्यानंतर बराच खर्च आल्याने आता अरबाजने त्याच्या वडिलांना दुसऱ्या रुग्णालयात हलवलं आहे. या व्हिडीओच्या अखेरीस त्याने चाहत्यांकडे आर्थिक मदतीचीही विनंती केली आहे. मला माझ्या बापाला मरताना पहायचं नाहीये, मला त्यांना काहीही करून वाचवायचं आहे, अशी भावनिक साद त्याने घातली आहे.