इराण-इस्रायलच्या युद्धादरम्यान दुबईत अडकली प्रसिद्ध अभिनेत्री; मोदींकडे केली विनंती

अमेरिका आणि इस्रायलने इराणविरोधात संयुक्त मोहीम हाती घेऊन त्या देशावर जोरदार हल्ले केले. मात्र इराणनेही इस्रायलसह कतार, कुवेत, बहारिन, संयुक्त अरब अमिराती इथल्या अमेरिकी लष्करी तळांवर प्रतिहल्ले करून संघर्ष अधिक वाढवला. या हल्ल्यानंतर भारतीय विमान कंपन्यांसह जगभरातील कंपन्यांनी पश्चिम आशियातील विमानसेवा स्थगित केली आहे. इराण, इराक, कुवेत, इस्रायल आणि बहारिन या देशांची हवाई हद्द शनिवारी पूर्ण रिकामी होती. तर ग्रीस, स्पेन, फ्रान्स, तुर्कीस जपान, अझरबैजान, ब्रिटन, नॉर्वे इत्यादी देशांच्या विमान कंपन्यांनी विमान उड्डाणे रद्द केल्याचं जाहीर केलं. दुबई विमानतळावरील उड्डाणेसुद्धा रद्द करण्यात आली आहेत. तिथल्या एअरपोर्टवर अनेक प्रवासी अडकले आहेत. ‘जन्नत’ या चित्रपटातून प्रकाशझोतात आलेली बॉलिवूड अभिनेत्री सोनल चौहानसुद्धा सध्या दुबईत असून तिने मदतीसाठी आवाहन केलं आहे.

सोनलने शनिवारी तिच्या इन्स्टाग्राम स्टोरीमध्ये एक पोस्ट लिहिली. त्यात तिने म्हटलंय, ‘आदरणीय पंतप्रधान नरेंद्र मोदीजी.. सध्या सुरु असलेल्या तणावादरम्यान मी दुबईत अडकले आहे. विमान उड्डाणं रद्द करण्यात आल्याने भारतात परतण्याचा कोणताही मार्ग स्पष्ट नाही. मला सुरक्षितपणे घरी परतण्यासाठी कृपया मार्गदर्शन आणि मदत करा. मी तुमची खूप आभारी राहीन.’ फक्त सोनलच नाही तर ऑलिम्पिक पदक विजेती पीव्ही सिंधूसुद्धा दुबई विमानतळावर अडकली आहे. पुढील सूचना मिळेपर्यंत सर्व उड्डाणं स्थगित करण्यात आल्याचं तिने सोशल मीडियावर सांगितलं आहे.

अभिनेत्रीची पोस्ट-

सोनलने 2008 मध्ये ‘जन्नत’ या चित्रपटातून बॉलिवूडमध्ये पदार्पण केलं होतं. या चित्रपटात तिने इमरान हाश्मीसोबत मुख्य भूमिका साकारली होती. त्यानंतर तिने तेलुगू, कन्नड, तमिळ अशा इतर भाषिक चित्रपटांमध्येही काम केलं. दरम्यान अमेरिका, इस्रायल आणि इराणने संयम बाळगावा, चर्चा आणि मुत्सद्देगिरीचा वापर करून युद्ध टाळावं, तसंच सर्व नागरिकांच्या संरक्षणाची खबरदारी घ्यावी, असं आवाहन भारताने केलं आहे. पश्चिम आशियातील वाढत्या तणावाबद्दल भारताला चिंता वाटत आहे, असं परराष्ट्र मंत्रालयाने दिलेल्या प्रतिक्रियेत नमूद केलं आहे.

इराणने प्रत्युत्तर म्हणून केलेल्या हल्ल्यांमध्ये युएईवर मोठ्या प्रमाणात क्षेपणास्त्र आणि ड्रोनने हल्ले केले. या हल्ल्यांमध्ये किमान एकाचा मृत्यू झाला. तर दुबईतील पाम जुमेराह या हॉटेलला आग लागली. त्यात किमान चौघे जखमी झाले. दुबईतील माध्यमांनी दिलेल्या वृत्तांनुसार, जगातील सर्वांत उंच इमारत असलेली बुर्ज खलिफा ही इमारत रिकामी करण्यात आली आहे.