Covaxin and Covishield : दोन्ही कोरोना लसींचं वेगळेपण काय? कुणाचे किती डोस, किंमत काय?
लसीकरणाला सुरुवात झाली असली तरी लोकांच्या मनात कोणती लस घ्यायची, भारतात कोणत्या लस उपलब्ध आहेत, या लसींमध्ये काय फरक आणि त्यांच्या किमती किती की मोफत असे अनेक प्रश्न तयार झालेत.
नवी दिल्ली : वाढत्या कोरोना संसर्गाच्या पार्श्वभूमीवर (Corona virus) देशभरात कोरोना लसीकरणाची मोहिम सुरु आहे. कोरोनाचा सामना करण्यासाठी व्यापक पातळीवर लसीकरणाचा निर्णय घेत सरकारने आता देशातील 18 वर्षांवरील सर्व नागरिकांना लसीकरणाचा निर्णय घेतलाय (Vaccination). 1 मेपासून 18 वर्षांवरील सर्वांना लसीकरणासाठी नोंद करता येणार आहे. यासाठी Co-Win या प्लॅटफॉर्म आणि आरोग्य सेतू अॅपवर (Arogya Setu app) 28 एप्रिलपासून नोंदणी सुरु होणार आहे. पहिल्यांदाच देशात सरकारी आणि खासगी रुग्णालयं कोरोना लस स्वतंत्रपणे खरेदी करुन लसीकरण करतील (What is different between Covaxin and Covishield what are prices).
आता लसीकरणाला सुरुवात झाली असली तरी लोकांच्या मनात कोणती लस घ्यायची, भारतात कोणत्या लस उपलब्ध आहेत, या लसींमध्ये काय फरक आणि त्यांच्या किमती किती की मोफत असे अनेक प्रश्न तयार झालेत. या सर्व प्रश्नांची उत्तरं शोधण्यासाठी हा स्पेशल आढावा. भारतात सध्या कोव्हॅक्सिन आणि कोविशिल्ड अशा दोन प्रमुख कोरोना लसींचा उपयोग मोठ्या प्रमाणात होतोय. त्यामुळेच नागरिकांच्या मनातील कोवॅक्सिन आणि कोविशिल्डबाबतच्या (Covaxin and Covishield) शंकाचं समाधान होणं आवश्यक आहे. त्यासाठी या दोन्ही लसींविषयीचे तपशील समजून घेऊयात.
कोणत्या लसीची परिणामकारकता किती?
भारत बायोटेकच्या कोवॅक्सिन आणि सीरम इंस्टीट्यूटच्या कोविशिल्ड या दोन्ही कोरोना लसींचे दोन दोन डोस घ्यावे लागतात. कोविशिल्डची परिणामकारकता 70 टक्क्यांपर्यंत आहे. मात्र, त्याची परिणामकारकता 90 टक्क्यांपर्यंत वाढू शकते. दुसरीकडे कोवॅक्सिनची परिणामकारकता आतापर्यंत 78 टक्के असल्याचं समोर आलंय. कोरोना रुग्णांबाबत या लसीची परिणामकारकता 100 टक्क्यांपर्यंत वाढू शकते.
कोरोना लसीच्या पहिल्या आणि दुसऱ्या डोसमध्ये किती अंतर असावं?
तुम्ही कोरोना लस घेताना प्रत्येक लसीच्या पहिल्या आणि दुसऱ्या डोसमध्ये ठराविक अंतर असणं आवश्यक आहे. यानुसार कोवॅक्सिन लस घेतल्यास पहिल्या डोसनंतर 4 ते 6 आठवड्यांच्या आत दुसरा डोस घेणं महत्त्वाचं आहे. जर तुम्ही कोविशिल्ड लस घेतली तर पहिल्या डोसनंतर 4-8 आठवड्यात दुसरा डोस घेणं आवश्यक आहे.
कोव्हॅक्सिन आणि कोविशिल्ड लसीची किंमत किती?
1. तुम्हाला कोरोना लसीसाठी किती पैसे द्यावे लागणार हे तुम्ही कोणती कोरोना लस कुठे घेताय यावर अवलंबून असणार आहे. सरकारी रुग्णालय आणि खासगी रुग्णालय या दोन्हींसाठी कोरोना लसीसाठी मोजाव्या लागणाऱ्या किमती वेगळ्या आहेत.
2. कोविशिल्ड वॅक्सीन राज्य सरकारला 400 रुपयांना आणि खासगी रुग्णालयांना 600 रुपयांना मिळते. ही किंमत पुढील महिन्यापासून म्हणजेच 1 मेपासून लागू होणार आहे. दुसरीकडे कोवॅक्सिनच्या एका डोससाठी राज्यांना 600 रुपयांना आणि खासगी रुग्णालयांना 1200 रुपयांना मिळणार आहे. याशिवाय कोवॅक्सिन लस 15 ते 20 डॉलर (जवळपास 800 ते 1500 रुपये) प्रती डोस या दराने इतर देशांमध्ये निर्यातही केले जाणार आहे.
आता नागरिकांना या लसीकरणासाठी किती रुपये माजावे लागणार हा मुख्य प्रश्न आहे. केंद्र सरकारच्या सर्व रुग्णालयांमध्ये लसीकरण मोफत असणार आहे.
3. दोन्ही लसींच्या किमती राज्य सरकारच्या रुग्णालयांसाठी आणि खासगी रुग्णालयांसाठी आहे. नागरिकांना किती पैसे मोजावे लागणार हे संबंधित रुग्णालयं किती शुल्क आकारणार यावर ठरणार आहे (Additional Service Fee). सध्या सीरमकडून केंद्र सरकारला केवळ 150 रुपयांमध्ये कोविशिल्ड लस मिळत आहे.
4. मध्य प्रदेश, हिमाचल प्रदेश, केरळ, गोवा, छत्तीसगड, केरळ, उत्तर प्रदेश, आसाम, सिक्किम, पश्चिम बंगाल, तमिलनाडुसह काही राज्य सरकारांनी कोरोना लसीकरण मोफत करण्याचा निर्णय घेतलाय. महाराष्ट्रातही याबाबत लवकरच घोषणा होण्याची शक्यता आहे.
हेही वाचा :
महाराष्ट्र दिनी मोफत लसीचं गिफ्ट मिळण्याची चिन्हं, अजित पवारांचे संकेत, ग्लोबल टेंडर काढणार
केंद्राला 150 रुपयात आणि राज्याला 400 रुपयांना, कोरोना लसीच्या दरात दुजाभाव का? : अशोक चव्हाण
व्हिडीओ पाहा :
What is different between Covaxin and Covishield what are prices
