ट्रम्प यांनी आदेश देताच इराण बेचिराख, अमेरिकाचा सगळा प्लॅन रेडी, फक्त…जग नव्या युद्धाच्या उंबरठ्यावर!
अमेरिका आणि इराण यांच्यातील संघर्ष वाढत चालला आहे. मिळालेल्या माहितीनुसार आता अमेरिका इराणवर हल्ला करण्यासाठी सज्ज झाली आहे. त्याबाबतचा प्लॅन डोनाल्ड ट्रम्प यांना कळवण्यात आला आहे.
Iran America Clash : इराण आणि अमेरिका यांच्यातील वाद अजूनही थांबण्याची चिन्हं दिसत नाहीयेत. हे दोन्ही देश एकमेकांच्या विरोधात उभे ठाकले आहेत. अमेरिका तेथील सरकार उलथवून लावण्याच्या प्रयत्नात आहे. याच प्रयत्नांचा एक भाग म्हणून अमेरिकेचे राष्ट्राध्यक्ष डोनाल्ड ट्रम्प यांनी आपले सैन्य तैनात केले असून कोणत्याही क्षणी इराणवर हल्ला होऊ शकतो, असे सांगितले जात आहे. असे असतानाच आता अमेरिकेचा इराणवरील हल्ल्याचा प्लॅन ठरला आहे. सोबतच अमेरिका इराणमधील अनेक दिग्गज नेत्यांना ठार करण्याच्या प्लॅन करत आहे. त्याबाबतचा विस्तृत प्लॅनही ठरला असल्याचे म्हटले जात आहे. त्यामुळे आता लवकरच मोठं काहीतरी घडणार असल्याची शंका व्यक्त केली जात आहे.
अमेरिका अनेक ठिकाणी हल्ला करण्याच्या तयारीत
रशिया टुडेने वॉल स्ट्रीट जर्नलच्या रिपोर्टचा हवाला देत याबाबतचे वृत्त दिले आहे. या वृत्तानुसार अमेरिकेचे राष्ट्राध्यक्ष डोनाल्ड ट्रम्प यांना इराणविरोधात करावयाच्या कारवाईबाबत सविस्तर माहिती देण्यात आली आहे. सोबतच सैन्य करावाई कशी केली जाईल, हेही ट्रम्प यांना सांगण्यात आले आहे. इराणचा अणुकार्यक्रम, इराणच्या बॅलिस्टिक मिसाईल्स अशा ठिकाणी हल्ला करणे तसेच इराणच्या सरकारवर वेगवेगळ्या मार्गांनी दबाव वाढवण्याचाही समावेश अमेरिकेच्या प्लॅनमध्ये आहे.
अमेरिकेचा नेमका प्लॅन काय?
मिळालेल्या माहितीनुसार अमेरिकेने इराणमध्ये सत्तांतर घडवून आणण्यासाठी एक प्लॅन तयार केला आहे. या प्लॅननुसार इराणमधील अनेक राजकीय नेते, सैन्यातील अधिकाऱ्यांना लक्ष्य केले जाऊ शकते. त्यांना थेट यमसदनी पाठवण्याचा अमेरिकेचा प्ल्रन आहे. सोबतच सध्याच्या खामैनी सरकारलाही उलथवून लावण्यासाठी अमेरिकेने प्लॅन तयार केला आहे. इराणमधील इस्लामिक रिव्हॉल्युशनरी गार्ड कॉर्प्सचे प्रमुख कमांडर तसेच प्रशासनातील उच्चाधिकाऱ्यांनाही टार्गेट केले जाऊ शकते. अमेरिका आपल्या प्लॅननुसार इराणचे सर्वोच्च नेते अयातुल्ला अली खामैनी, राष्ट्रपती मसूद पेजेक्शियान, परराष्ट्रमंत्री अब्बास अराघची यांच्यावरही हल्ला केला जाऊ शकतो, असे म्हटले जात आहे. दरम्यान, अमेरिकेचा हा कथित प्लॅन समोर आल्यानंतर भविष्यात नेमकं काय होणार? हे पाहणे महत्त्वाचे ठरणार आहे.
